न्यायाधीशले प्रधानमन्त्रीको मान्छे भेट्दैमा महाभियोग लगाउनु प्रतिशोधपूर्ण हुन्छ : बार अध्यक्ष मिश्र

काठमाडौँ । नेपाल बार एसोसिएसनका अध्यक्ष प्रा. डा. विजयप्रसाद मिश्रले सर्वोच्च अदालतका न्यायाधीशहरूले प्रधानमन्त्रीको मान्छे भन्दै आउनेलाई व्यक्तिलाई होटलमा भेटेको विषयलाई लिएर महाभियोग लगाउने कुरा गलत र प्रतिशोधपूर्ण हुने बताएका छन्।

उनले न्यायाधीशहरूको उक्त भेटलाई व्यक्तिगत स्वार्थ वा आर्थिक लेनदेनसँग जोडेर हेर्न नहुने तर्क गरेका छन्।

न्यूज नेपालसँगको कुराकानीमा अध्यक्ष मिश्रले न्यायाधीशहरू कुनै मुद्दाको सेटिङ गर्न नभई आफूहरूलाई निरन्तर दबाब दिइरहेका व्यक्तिहरूको वास्तविकता बुझ्ने उद्देश्यले भेट्न गएको दाबी गरे। उनका अनुसार, न्यायालयमाथि विभिन्न पक्षबाट दबाब सिर्जना भइरहेको अवस्थामा त्यस्ता व्यक्तिको पहिचान र गतिविधिबारे जानकारी लिनु अस्वाभाविक मान्न सकिँदैन।

उनले सामान्य भेटघाटलाई आधार बनाएर न्यायाधीशमाथि महाभियोगको अस्त्र प्रयोग गर्न खोजिए त्यसले न्यायपालिकालाई भय र दबाबमा राख्ने काम गर्ने बताए। यस्तो प्रवृत्तिले न्यायपालिकाको स्वतन्त्रता मात्र कमजोर नबनाई समग्र विधिको शासनमाथि नै गम्भीर असर पार्न सक्ने उनको भनाइ छ।

मिश्रले तथ्य र प्रमाणको निष्पक्ष छानबिन नगरी सार्वजनिक भएका हल्लाका आधारमा न्यायाधीशहरूको निष्ठामाथि प्रश्न उठाउनु उचित नहुने पनि बताए। न्यायपालिकाको साख जोगाउन महाभियोगको धम्कीभन्दा विधि, प्रक्रिया र प्रमाणका आधारमा विषयको निरूपण हुनुपर्नेमा उनले जोड दिए।

उनका अनुसार पछिल्लो समय न्यायालयमा राजनीतिक हस्तक्षेप गर्ने तथा दुईतिहाइको शक्ति देखाएर न्यायाधीशमाथि दबाब सिर्जना गर्ने प्रवृत्ति बढेको छ। यही परिस्थितिमा न्यायाधीशहरू आफूलाई दबाब दिने व्यक्तिहरूको पहिचान र वास्तविकता बुझ्न बाध्य भएको उनको तर्क छ।

न्यायपालिकाको स्वतन्त्रता र न्यायाधीशको जवाफदेहिताबीच सन्तुलन कायम हुनुपर्ने उल्लेख गर्दै मिश्रले कुनै पनि विषयलाई राजनीतिक प्रतिशोधको माध्यम बनाउन नहुने धारणा राखेका छन्।

Comments