बन्दकोठामा आलोपालोको निर्णय नगर्न गगनको खबरदारी

राजनीति

- न्यूज नेपाल

६ पुस, काठमाडौं । नेपाली कांग्रेसका महामन्त्री गगनकुमार थापाले पार्टीमा संस्थागत रुपमा छलफल नगरी राष्ट्रपति पद तथा प्रधानमन्त्रीमा आलोपालोबारे निर्णय नगर्न सचेत गराएका छन् । कांग्रेस संसदीय दलको निर्वाचन परिणाम सार्वजनिक भएपछि थापाले यस्तो बताएका हुन् ।

उनले कुनै पनि अर्को पार्टीसँग सरकार चलाउने सन्दर्भमा आलोपाला भनेर गरिने कुनै पनि समझदारी संस्थागत रुपमा निर्णय हुनुपर्नेमा जोड दिए । योभन्दा अगाडिको समयमा जस्तो आलोपालो गर्ने निर्णय बन्द कोठामा नेताहरु बसेर गरे त्यो मान्य नहुने थापाको भनाइ छ ।

महामन्त्री थापाले भने ‘संसदीय दलको नेताले नै निर्णय गर्ने हो, तर दलको नेताले प्रस्ताव गर्नुहुन्छ, संसदीय दलमा छलफल हुन्छ, पार्टीको सम्बन्धित कमिटीमा छलफल हुन्छ ।’ प्रधानमन्त्रीमा आलोपालोबारे बन्दकोठामा गरिने निर्णय व्यक्तिगत हुने थापाको दाबी छ ।

थापाले कांग्रेस संसदीय दलको नेतामा शेरबहादुर देउवासँग प्रतिस्पर्धा गरेका थिए । देउवा ६४ मतका सात दलको नेता निर्वाचित हुँदा थापाले २५ मत प्राप्त गरे । राष्ट्रपति पदका सन्दर्भमा पनि खुला र पारदर्शी छलफल गरेर मात्र निर्णय गर्नुपर्ने थापाको अडान छ ।

उनले आलोपालो, राष्ट्रपतिका सन्दर्भमा कांग्रेसको कुनै पनि निर्णय पारदर्शी नभएको जनाएका छन् । सम्बन्धित कमिटीमा छलफल भएन भने व्यक्तिगत निर्णयका रुपमा दर्ज हुने महामन्त्री थापाको भनाइ छ ।