फागुन १५ मा स्ववियु निर्वाचन, त्रिविले थाल्यो तयारी

काठमाडौं । त्रिभुवन विश्वविद्यालय स्ववियु परिषद्को बैठकले फागुन १५ गते हुने स्वतन्त्र विद्यार्थी युनियन (स्ववियु) निर्वाचनको तयारी थालेको छ। त्रिविका शिक्षाध्यक्ष एवं परिषद्का अध्यक्ष प्राडा खड्ग केसीको अध्यक्षतमा मंगलबार बसेको बैठकले निर्वाचनको सबै तयारी गर्ने निर्णय गरेको हो।

परिषद्को निर्णयसँगै देशैभरका क्याम्पसमा निर्वाचनको सरगर्मी बढेको छ। गत वर्ष सम्पन्न त्रिवि सभा बैठक (सिनेट)को निर्णयको आधारमा आगामी फागुन १५ गते निर्वाचन गर्ने निर्णय भएको हो। त्यसकै आधारमा मंगलबार परिषद्को बैठकले त्रिवि विद्यार्थी कल्याण तथा खेलकुद निर्देशनालयलाई निर्वाचन गर्ने जिम्मा दिएको हो।

निर्देशनालयका निर्देशक एवं परिषद्का सदस्यसचिव पशुपति अधिकारीले परिषद्को बैठकले निर्वाचन गर्ने निर्णय अनुमोदन गरेको जानकारी दिए। उनले भने– ‘परिषद्को बैठकको निर्णयको आधारमा फागुन १५ गते स्ववियु निर्वाचन हुनेछ।’

शिक्षाध्यक्ष अध्यक्ष रहेको परिषद्को उपाध्यक्ष रजिस्टार केदारप्रसाद रिजाल हुने व्यवस्था छ। सदस्यहरूमा ३ जना स्ववियु सभापति, ३ जना डीन र ३ जना क्याम्पस प्रमुख रहने व्यवस्था छ । स्ववियु सभापतिको तर्फबाट ताहाचल क्याम्पसका स्ववियु सभापति ईश्वर थापा, अस्कलका प्रेम जैसी र पद्मकन्या क्याम्पसकी स्ववियु सभापति ज्योति पनेरु रहेका छन् । परिषद्को सदस्यसचिवमा विद्यार्थी कल्याण तथा खेलकुद निर्देशनालयका निर्देशक रहने व्यवस्था छ ।

सो बैठकले निर्णय गरेर कार्यान्वयन गर्न निर्देशनालयलाई जिम्मा दिएको छ । निर्देशक अधिकारीका अनुसार निर्देशनालयले त्रिविका पदाधिकारीसँग छलफल गर्नेछ । त्यसपछि विद्यार्थी संघ संगठनसँग छलफल गरी माघ १५ गतेभित्र कार्यतालिका सार्वजनिक गर्नेछ ।

उपकुलपति प्राडा केशरजंग बरालले क्यालेन्डरमा फागुन १५ मा स्ववियु निर्वाचन गर्ने उल्लेख भएकाले सोही दिन निर्वाचन गर्ने निर्णय परिषद्ले गरिसेकेको बताए । उपकुलपति प्राडा बरालले नीति तथा कार्यक्रममा फागुन १५ मा स्ववियु निर्वाचन गर्ने उल्लेख गरे ।

स्ववियु पदाधिकारीको दुईवर्षे कार्यकाल सकेसँगै त्रिविले स्ववियु निर्वाचन प्रक्रिया शुरू गर्न लागेको हो । ‘दुई वर्षअघि स्थगित भएका उपत्यकाको ४ सहित उपत्यकाका बाहिरका ८ गरी १२ सहित ६२ वटा आंगिक र झन्डै ७ सय सम्बन्धनप्राप्त क्याम्पसमा एकैसाथ स्ववियु निर्वाचन गर्ने तयारी छ’ –निर्देशक अधिकारीले भने ।

स्थगित भएका र दुईवर्षे कार्यकाल पूरा भएका सबै क्याम्पसमा स्ववियु निर्वाचन हुने निर्देशक अधिकारीले बताए । उपत्यका ४ र उपत्यका बाहिरका ८ सहित देशभरका १२ क्याम्पसमा निर्वाचन स्थगित भएको थियो । त्रिभुवन विश्वविद्यालयअन्तर्गत ६२ आंगिक क्याम्पस छन् ।

गतवर्ष देशभर ५० आंगिक र करिब ३ सय ५० भन्दा बढी सम्बन्धन प्राप्त क्याम्पसमा निर्वाचन भएको थियो । करिब ६ सय ५० क्याम्पसमा निर्वाचन भए नभएको रेकर्ड छैन । त्रिविको शैक्षिक क्यालेन्डरमा प्रत्येक २–२ वर्षमा फागुन १५ मा निर्वाचन गर्ने उल्लेख छ ।

त्रिविले गएको निर्वाचन प्रणालीअनुसार निर्वाचन गर्ने तयारी गरेको छ । निर्देशक अधिकारीले आउँदो निर्वाचनमा स्ववियु अध्यक्ष, सचिव, कोषाध्यक्ष र ५० प्रतिशत सदस्य प्रत्यक्ष निर्वाचन प्रणालीबाट चुनिनेछन्।

उपाध्यक्ष, सहायक सचिव र ५० प्रतिशत सदस्य सामानुपातिक प्रणालीमार्फत चुनिनेछन्। निर्वाचनमा भाग लिने स्ववियु पदाधिकारी र सदस्यको उमेर हद २८ वर्ष नै कायम हुने गरी तयारी थालेको छ।

Comments