प्रधानन्यायाधीश राउतले गरे बेलायतको सर्वोच्च अदालतका अध्यक्षसहित शीर्ष भेट

काठमाडाैं । प्रधानन्यायाधीश प्रकाशमान सिंह राउतले बेलायत भ्रमणको क्रममा संयुक्त अधिराज्यको सर्वोच्च अदालतका अध्यक्ष लर्ड रीड अफ अल्लरमुइरसँग उनकै कार्यकक्षमा भेटघाट गरेका छन् ।

विश्वमै उदाहरणीय कानूनी अभ्यास गरिरहेको बेलायतको सर्वोच्च अदालतका अध्यक्ष लर्डसँग प्रधानन्यायाधीश राउतको भ्रमण टोलीले भेटेको छ । बेलायत भ्रमणमा प्रधानन्यायाधीश राउतसंगै सर्वोच्च अदालतका न्यायाधीश हरि फुयाँल, विशेष अदालतका न्यायाधीश रीतेन्द्र थापा, उच्च अदालतका न्यायाधीश हेमन्त रावल र सर्वोच्च अदालतका रजिष्ट्रार विमल पौडेल संलग्न छन् ।

नेपालको न्यायिक क्षेत्रमा कहलिएका न्यायाधीश फुयालसहित विशेष अदालतका रीतेन्द्र र उच्चका हेमन्तसहित रजिष्ट्रार विमल पाैडेल लगायतले बेलायतको न्यायिक अभ्यास र अदालती प्रक्रियाबारे ज्ञान लिएर आफ्नो देशको न्याय क्षेत्रमा योगदान दिन सक्ने विश्वास गरिएको छ। अब्बल र न्यायिक प्रक्रियामा गहिरो दख्खल न्यायाधीशहरु बेलायत भ्रमणबाट विश्वको न्यायिक प्रणालीबारे बुझ्ने र नेपालको न्यायिक प्रणालीलाई थप विश्वासिलो बनाउनेमा लाग्ने विश्वास समेत गरिएको छ।

बेलायतको सर्वोच्च अदालतका अध्यक्षसंगको भेटमा दुई न्यायाधीशीले सद्भावना पत्रमा हस्ताक्षर आदानप्रदान गरे । यो हस्ताक्षरले नेपाल र संयुक्त अधिराज्यको सर्वोच्च अदालतबिच लामो समयदेखिको सम्बन्ध अझ सुदृढ बनाउने अपेक्षा गरिएको छ । भने न्यायिक कार्यकुशलतामा समेत सकारात्मक प्रभाव पर्ने विश्वास गरिएको छ ।

भेटमा प्रधानन्यायाधीश राउतले सर्वोच्चका केहि ऐतिहासिक फैसलाबारे प्रकाश पारेका थिए भने अध्यक्ष लर्डले नेपाल बेलायतबीचको ऐतिहासिक सम्बन्ध र न्यायिक क्षेत्रलाई सहयोगको वचन समेत दिएका थिए ।

सद्भावना पत्रले न्यायिक अधिकारीहरुलाई तालिम, अनुभव आदानप्रदान र न्यायिक क्षेत्रमा सहकार्यको ढोका खोल्ने अपेक्षा गरिएको छ ।

उसोतः प्रधानन्यायाधीश राउतले इङ्ग्ल्याण्ड र वेल्सका महिला प्रधानन्यायाधीश ब्यारोनेस कार अफ वाल्टन–अन–द–हेलसँग दुई देशका न्यायिक संयन्त्रबिचको सहकार्यका सम्भावनाबारे छलफल गरेका थिए । प्रधानन्यायाधीश राउतले बेलायतको हाउस अफ कमन्सका सभामुख सर लिन्डसे होयलसँग पनि भेट गरेका छन् ।

सोही दिन प्रधानन्यायाधीशसँग इङ्ग्ल्याण्ड र वेल्सको न्यायपालिकाका न्यायाधीश रोबिन नोल्स, लर्ड जस्टिस डिङ्गेमेन्स, अन्तरराष्ट्रिय न्यायिक टोलीका लर्ड जस्टिस स्नोडेन, श्रीमती एडी, एडवर्ड लर्ड गार्नियर, किंग्स कलेज लन्डनका प्रोफेसर जेम्स ली र हाउस अफ कमन्सका सांसद डेभिड स्मिथ जस्ता प्रवुद्ध व्यक्तित्वहरूसँग भेट गरेका थिए ।

बेलायत भ्रमणको क्रममा प्रधानन्यायाधीश राउतले बेलायतको न्यायिक प्रणालीका प्रमुख व्यक्तिहरूसँगको बैठकमा भाग लिएका थिए, जसमा ‘जुडिसियल अपोइन्टमेन्ट कमिस्नर’ तनवीर इकराम, इङ्ग्ल्याण्ड र वेल्सको बार अध्यक्ष श्रीमती बारबरा मिल्स केसी र बार काउन्सिलको अन्तरराष्ट्रिय समितिका अध्यक्ष ह्यु मर्सर केसी पनि रहेका थिए । बैठकमा प्रधानन्यायाधीश राउतले न्यायिक अभ्यासमा बेलायतको कामको प्रसंसा गर्दै सद्भावना पत्रबारे समेत आफ्नो धारणा राखेका थिए ।

यस्तै, बेलायतस्थित नेपाली राजदूत चन्द्रकुमार घिमिरेले प्रधानन्यायाधीश राउत नेतृत्वको प्रतिनिधिमण्डलको सम्मानमा स्वागत समारोह आयोजना गरेका थिए, जसमा बेलायतको सर्वोच्च अदालतका अध्यक्ष लर्डदेखि प्रतिष्ठित व्यक्तिको सहभागीता रहेको थियो ।

गत १ मेमा नेपाली प्रतिनिधिमण्डलले बेलायतको न्यायिक क्षेत्रका प्रमुख व्यक्तित्वहरू ओल्ड बेली (केन्द्रीय फौजदारी अदालत) का एन्थोनी लियोनार्ड केसी र सारा ह्वाइटहाउस साथै इनर टेम्पल इन्टरनेशनल कमिटीका अध्यक्ष किरोन बिल केसीसँग अन्तरक्रिया गरेको थियो । बेलायत भ्रमणको क्रममा प्रतिनिधिमण्डलले दुई देशको न्यायिक प्रणाली र अभ्यासहरूको बारेमा जान्न र अन्तर्दृष्टि आदानप्रदान गर्न स्कटल्याण्डको भ्रमण समेत गरेको छ ।

Comments