रविको बन्दी प्रत्यक्षीकरण रिटको सुनुवाईमा सरकारी पक्ष कमजोर बन्ने आशंका किन ?

काठमाडाैं । राष्ट्रिय स्वतन्त्र पार्टीका सभापति रवि लामिछानेले सर्वोच्च अदालतमा दिएको बन्दी प्रत्यक्षीकरणको मुद्दामा बुधवार सरकारी पक्षले बहस गर्ने भएका हुन् ।

रवि पक्षका कानून व्यवसायीले मंगलबार बहस सकेपछि बुधवार सरकारी पक्षले प्रतिरक्षा बहस गर्ने भएको हो । तर, सरकारी पक्षको बहस कस्तो बन्ला ? यो चासोका साथ हेरिएको छ ।

महान्यायधिवक्ता रमेश बडाल र नायब महान्यायधिवक्ता टेक बहादुर घिमिरे एकसाता लामो रुस भ्रमणमा निस्किएका छन् । उनीहरु बहसमा सहभागी हुने छैनन भने पहिलो नम्बरका सह-न्यायाधिवक्ता सूर्यराज दाहालले तत्कालीन महान्यायाधिवक्ता डा.दिनमणी पोखरेलको पालामा रविलाई क्लिन चिट दिदा दाहालले बहस गरेकाले उनी समेत अहिले यो मुद्दाको बहसमा सहभागी हुने अवस्था छैन् ।

यता, अर्का प्रभावशाली नायब महान्यायधिवक्ता संजीवराज रेग्मी काठमाडाैं बाहिर रहेका छन् । यस्तो स्थितिमा सरकारी पक्षबाट बहस गर्नेमा नायब महान्यायाधिवक्ता लोकराज पराजुली, सहन्यायाधिवक्त्ताहरु ध्रुवकुमार चौहान, दिनेश प्रसाद घिमिरे, गोविन्द खनाल र उपन्यायाधीवक्ता रामप्रसाद पन्थी र बिना दाहाल रहेको महानयायाधीवक्ताको कार्यालयले जनाएको छ ।

मंगलबारदेखि न्यायाधीशद्वय नकहुल सुवेदी र बालकृष्ण ढकालको इजलासमा सुनुवाइ चलिरहेको रविको बन्दी प्रत्यक्षीकरणको रिटमा सरकारी पक्ष कसरी पेश हुन्छ भन्ने आम चासोकाबीच आजै फैसला आउनसक्ने सर्वोच्च स्रोतको दाबी छ ।

‘सरकारले प्रतिरक्षा गर्ने मुद्दामा आफ्नो क्षमता, कानून र यसका विभिन्न आयामहरुलाई लिएर पेश हुने र आफ्ना तर्क राख्ने हो । फैसला त अदालतले न गर्ने हो । सरकारी पक्षले आफ्नो सतप्रतिशत दिन्छ । व्यक्ति को भन्दा पनि अपराध आरोप के भन्ने कुरा नै महत्वपूर्ण हो । व्यक्तिगत रुपमा भन्दा पनि न्यायको पक्षमा वकालत गर्ने कुरा न हो । यसमा शंका र कमजोर हुने भन्ने कुरा रहन्न ।’, एक उच्च अधिकारीले न्यूज नेपालसंग भने ।

रवि अहिले रुपन्देही कारागारमा रहेका छन् । सहकारी ठगी, संगठित अपराध लगायतका आरोपमा उच्च अदालत तुलसीपुर वुटवल इजलासले उनलाई पूर्पक्षकालागि थुनामा पठाउने आदेश दिएपछि रवि कारागार चलान भएका हुन् ।

रवि पूर्पक्षका लागि थुनामा पुगेपछि सर्वोच्चमा बन्दी प्रत्यक्षीकरणको रिट लिएर रवि पत्नी निकिता पाैडेल लामिछाने पुगेकी थिइन् । यहि मुद्दामा बुधबार पनि सुनुवाई हुँदैछ ।

Comments