कुलिङ पिरियडमा ‘जालझेल’ गर्ने विरुद्ध छानबिनको माग, कसको प्रतिक्रिया कस्तो ?

काठमाडौं । प्रतिनिधि सभाले पारित गरेको निजामती विधेयकको कुलिङ पिरियडसम्बन्धी व्यवस्था हेरफेर भएको पाइएपछि राजनीतिक वृत्तमा खैलाबैला मच्चिएको छ ।

राज्य व्यवस्था तथा सुशासन समितिले पारित गरेको विधेयकमा अनाधिकृत हेरफेर गरेको पाइएपछि सांसदहरुले आपत्ति जनाउँदै राज्य व्यवस्था तथा सुशासन समितिका सभापती रामहरी खतिवडा र सचिवको राजिनामा  माग गरेका छन्।

जनताद्वारा निर्वाचित सार्वभौम संसद्का जनप्रतिनिधिहरुले पास गरेको विधेयकमा अनधिकृत हेरफेर निकै गम्भिर जालझेल र अक्षम्य गल्ती गरेको संसदहरुले जिकिर गरेका छन् । अहिले यस विषयलाई लिएर प्रतिपक्षमा मात्र नभएर सत्तापक्षीय सांसदहरुले पनि छानबिन तथा दोषि उपर कारबाहीको माग गरेका छन् ।

केमा गरियो जालझेल ? ?

विधेयकको दफा ८२ (४) मा ‘निजामती कर्मचारी वा अन्य सरकारी सेवाबाट राजीनामा दिएको वा अवकाश भएको कर्मचारीले सेवाबाट अवकाश भएको मितिले दुई वर्ष अवधि पूरा नभई कुनै पनि संवैधानिक वा सरकारी पदमा नियुक्ति पाउने छैन,’ भन्ने व्यवस्था छ । तर त्यसलाई खण्डित गर्ने गरी दफा ८२, (५), (क) मा ‘संवैधानिक वा कूटनीतिक नियुक्ति तथा नेपाल सरकारले गर्ने अन्य कुनै नियुक्तिबाहेकको पदमा’ मात्र नियुक्ति लिन नपाइने भन्ने व्यवस्था गरी ‘कुलिङ अफ पिरियड’को व्यवस्थालाई निष्प्रभावी बनाइएको छ ।

यस विषयलाई लिएर कसले के भने ?

नेकपा एमाले–नेकपा एमालेका नेता पदम गिरीले संघीय निजामती सेवा विधेयकमा कुलिङ पिरियड सम्बन्धी व्यवस्थामा गरिएको हेरफेरलाई गम्भिर षडयन्त्र भनेर टिप्पणी गर्दै यस्तो कार्यमा संलग्नले नैतिकताको आधारमा ठाउँ छोड्नुपर्छ र कारबाही भोग्नुपर्ने बताएका छन् ।

सिंहदरबारमा पत्रकारहरुसँग उनले संसदीय समितिको प्रतिवेदन प्रतिनिधि सभाबाट पास हुँदाको भन्दा फरक कुरा आएको भन्दै यसलाई गम्भीर षडयन्त्रको संज्ञा समेत दिएका छन् ।

नेपाली कांग्रेस– नेपाली कांग्रेसका नेता डा. शेखर कोइरालाले संसदीय समितिबाट सर्वसम्मत पास भएको निजामती सेवा विधेयकमा अनधिकृत रुपमा परिवर्तन गराइनु ‘घोर अपराध’ र सार्वभौम संसदप्रतिको ‘अपमान’ भएको बताएका छन्।

उनले सामाजिक सन्जालमा लेखेका छन्, ‘सर्वसम्मतिबाट संसदमा पेस भएको निजामती सेवा विधेयक अनधिकृत रुपमा परिवर्तन गरिनु, गराइनु कुनै सामान्य घटना नभई, देश र जनताप्रति गरिएको घोर अपराध र सार्वभौम संसदप्रति गरिएको अपमान हो । ‘यस प्रकरणमा जोडिएकालाई तुरुन्त हदैसम्मको कारवाही अगाडि बढाई, परिवर्तन गरिएको व्यवस्थालाई आजै पुरानै अवस्थामा लैजाउँ ।’

रास्वपा- राष्ट्रिय स्वतन्त्र पार्टी (रास्वपा)ले कुलिङ पिरियडमा भएको गलत कार्यको जिम्मेवारी लिन राज्य व्यवस्था तथा सुशासन समितिका सभापति रामहरि खतिवडालाई राजीनामा दिन आग्रह गरेको छ । रास्वपाका प्रवक्ता मनिष झाले सामाजिक सञ्जालमार्फत सभापति खतिवडाको राजीनामा मागेका हुन् ।

नेकपा माओवादी– नेकपा माओवादी केन्द्रका उपमहासचिव जनार्दन शर्माले विधेयकमा भएको चलखेललाई गम्भीर अपराधको संज्ञा दिंदै छानबिन गरी दोषीलाई कारबाही गर्न माग गरेका छन् ।

मंगलबार संसद भवन परिसरमा पत्रकारहरूसँग कुरा गर्दै शर्माले विधेयकमा नियतवश हेरफेर गरिएको दाबी गरेका छन्। साथै उनले यो कार्य संसदको सार्वभौम अधिकारमाथिको हस्तक्षेप भएको भन्दै कडा शब्दमा आलोचना गरे।

नेकपा एकीकृत समाजवादी–नेकपा एकीकृत समाजवादीका वरिष्ठ उपाध्यक्ष राजेन्द्र पाण्डेले विधेयकमा गरिएको हेरफेरमा संलग्नलाई छानबिन गरी कारबाही गर्नु पर्ने माग गरेका छन् । साथै उनले विधेयकमा गरिएको हेरफेरमा संलग्नलाई कारबाही नगरिए राज्य व्यवस्था समितिको बैठकमा नबस्ने चेतावनी दिए ।

त्यस्तै, सभामुख देवराज घिमिरे निजामती विधेयकमा अन्यथा अर्थ लाग्ने गरी शब्द थप भएको विषयमा छानबिनको पक्षमा उभिएका छन् । मंगलबार सिंहदरबारमा भएको विभिन्न दलका नेताहरूसँगको छलफलमा सभामुख घिमिरेले यसलाई गम्भीर त्रुटि भएको बताउँदै त्यसलाई सच्याउने र यस विषयमा गम्भीर छानबिन गर्ने जनाएका छन् ।

Comments