बैंक ग्यारेन्टी बुझाएका रविले अपराध स्वीकार गरेका हुन् ?

काठमाडाैं । राष्ट्रिय स्वतन्त्र पार्टीका सभापति रवि लामिछानेले सुप्रिम सहकारी ठगी प्रकरणमा आफ्नो भागमा पर्ने रकम बुझाएर धराैटीमा छुट्नका लागि निवेदन दिएको खुलेको छ ।

लामिछानेले जिल्ला अदालत रुपन्देहीमा २ करोड ७४ लाख ८४ हजार रुपैयाँ ब्याङ्क ग्यारेन्टी पेस गरेपछि धेरैले रविले अपराध स्वीाकार गरेको भन्न थालेका छन् ।

राजनीतिक प्रतिशोध साँधिएको भन्दै हस्ताक्षर संकलन, रकम संकलनमा जुटेको रास्वपाले अभियान सञ्चालन गर्दै गर्दा रविले निवेदन दिएपछि यो विषयमा हंगामा नै चलेको हो ।

;’राजनीतिक प्रतिशोध नि भन्ने अनि आफ्नो भागमा पर्ने रकम पनि बुझाउदै जानुले अपराध स्वीकार गरेको किन नभन्ने ? अपराध नै नगरेको मान्छेले थुनाबाहिर आउनलाई यस्तो तिकडम गर्दै गर्दैन नि । बाहिर आए राजनीतिक दाउपेच चलाएरै भएपनि न्यायालयलाई प्रभावित पार्न सकिन्छ कि भन्ने देखिन्छ । जुन सरासर गलत छ । यो लोकतन्त्र र न्यायिक निष्पक्षतामाथिको पनि सवाल हो ।’ एक पूर्वन्यायाधीशले न्यूज नेपालसंग भने ।

सुप्रिम सहकारीको बचत अपचलनमा रूपन्देही जिल्ला अदालतमा लामिछानेसहित २२ जनालाई प्रतिवादी बनाइएको छ । उनीहरूमाथि सरकारी वकिलको कार्यालयले ५५ करोड ५९ लाख रुपैयाँ सामूहिक बिगो माग गरेको छ ।

उक्त सामूहिक बिगो २२ जनालाई भाग लगाउँदा आफ्नो भागमा पर्ने रकमको ब्याङ्क ग्यारेन्टीसहित लामिछानेले अदालतमा निवेदन दिएका हुन् ।

उनले मुलुकी फौजदारी कार्यविधि संहिताको दफा ६८ र ७१ अन्तर्गत बिगोबराबरको जमानत राखेर आफूलाई रिहाइ गर्न निवेदन दिएको अदालतले जनाएको छ।

लामिछानेविरुद्ध रूपन्देहीसहित काठमाण्डू, चितवन र पोखरामा फरकफरक सहकारीको बचत अपचलनमा संलग्न भएको अभियोगका मुद्दा विचाराधीन छन् । कास्की, चितवन र काठमाण्डूबाट थुनाबाहिर रहेर मुद्दा लड्न अनुमति पाएका लामिछानेले तीन जिल्लामा गरी १ करोड ७९ लाख रुपैयाँ धरौटी राखेका छन् ।

लामिछानेलाई कास्की जिल्ला अदालतले ६५ लाख रुपैयाँ, काठमाण्डू जिल्ला अदालतले ६० लाख रुपैयाँ र चितवन जिल्ला अदालतले ५४ लाख धरौटी माग गरेको थियो ।

Comments