राजदूत ढकालको विशेष पहलमा साउदीबाट ६२ नेपाली रिहा

Breaking News

- न्यूज नेपाल

काठमाडौँ । साउदी अरेबियाले ईद र इस्लामिक वर्ष १४४६ हिजारीको अवसरमा ६२ नेपाली कैदी रिहा भएका छन् ।

साउदी अरबका लागि नेपाली राजदूत डा. नरेशबिक्रम ढकालको विशेष पहलमा विभिन्न अपराधमा कैद भुक्तान गरिरहेका नेपालीहरु रिहा भएका हुन् ।

यसअघि कतारको राजदूत हुँदा त्यहाँका शेख तमिम बिन हमाद अल थानीको राजकीय भ्रमण नै गराउन सफल भएका थिए । कुटनीतिक क्षेत्रमा अब्बल क्षमता प्रदर्शन गर्दै आएका ढकालले कतारपछि साउदी अरेबियाको राजदूतको जिम्मेवारी लिएका थिए ।

साउदी पुगेपछि समेत राजदूत ढकालले विभिन्न कारण कैद सजाय भोगिरहेका नेपालीहरुलाई नेपाल फिर्ता ल्याउनका लागि विशेष काम गर्दै आएका छन् । एकैपटक ठूलो संख्यामा नेपालीहरु रिहा भएपछि मंगलबार परराष्ट्र मन्त्रालयले धन्यवाद समेत दिएको छ । मन्त्रालयले साउदी सरकारप्रति धन्यवाद प्रकट समेत व्यक्त गरेको छ ।

मन्त्रालयले साउदी सरकारद्वारा नेपाली नागरिकहरूप्रति देखाइएको सद्भावपूर्ण व्यवहारले दुई देशबिचको सम्बन्ध थप प्रगाढ हुने विश्वास समेत व्यक्त गरेको छ ।

रिहा गरिएका नेपाली नागरिकहरू आवश्यक कानुनी प्रक्रिया पूरा गरी साउदी सरकारका सम्बन्धित निकायबाट अनुमति पाएपछि नेपाल फर्कने मन्त्रालयले जनाएको छ ।