एमाले विधान महाधिवेशनः कर्ण थापाको फरक मत कार्यसूचीबाटै हटाइयाे !

राजनीति

- न्युज नेापल

काठमाडाैं । नेकपा (एमाले) को दोस्रो विधान महाधिवेशनमा फरक मत राख्ने अधिकारमै प्रतिबन्ध लगाइएको घटनाले पार्टीभित्रको आन्तरिक लोकतन्त्र गम्भीर संकटमा परेको संकेत देखिएको छ।

महाधिवेशनमा अध्यक्ष केपी शर्मा ओलीले स्थायी कमिटी सदस्य कर्ण थापाको फरक मतलाई कार्यसूचीबाटै हटाइदिएका छन्।

थापाले पार्टीको आन्तरिक लोकतन्त्र, संगठनात्मक कमजोरी र पूर्वराष्ट्रपति विद्यादेवी भण्डारीको सदस्यता निरन्तरताजस्ता विषय उठाउँदै ३२ पृष्ठ लामो फरक मत तयार पारी पार्टी केन्द्रीय कार्यालयमा दर्ता गराएका थिए।

तर उक्त प्रतिवेदनलाई महाधिवेशनको औपचारिक कार्यसूचीमा राख्न ओलीले अस्वीकार गरेका हुन्। थापाले पार्टी जीवनमा लोकतान्त्रिक अभ्यासको खाँचोबारे आफ्नै अध्यक्ष ओलीले उठाएका विषयहरूमाथि समेत छलफल गर्न चाहेका थिए। यद्यपि कार्यसूचीमा समावेश भए पनि अन्तिम समयमा आएर उनलाई बोल्न रोक लगाइएको हो।

यस घटनाले एमालेभित्र आन्तरिक आलोचनालाई दबाउने प्रवृत्ति बढ्दै गएको र नेतृत्वप्रति असहमति राख्ने अधिकार कुण्ठित भइरहेको आलोचकहरूले टिप्पणी गरेका छन्।