दुई महिनापछि नेपाल आउन थाले तातोपानी नाकामा रोकिएका कन्टेनर !

Breaking News

- न्युज नेपाल

काठमाडौं । सिन्धुपाल्चोकको भोटेकोशी गाउँपालिका–२ स्थित कोदारी बजारनजिकै पर्ने इकुसहित चार ठाउँमा खसेको पहिरोले पन्छाएसँगै उत्तरी चीन जोड्ने तातोपानी नाका जोड्ने अरनिको राजमार्ग सञ्चालनमा आएको छ ।

राजमार्ग सञ्चालनमा आएसँगै दशैँ–तिहारका लागि चीनबाट आउने सामान धेरथोर मात्रामा भए पनि काठमाडौं भित्रिन थालेका छन् । सोमबार करिब ५ बजे एकतर्फी रुपमा राजमार्ग सञ्चालनमा आएपछि ८–१० वटा सवारीसाधन तातोपानी नाकाबाट नेपाल भित्रिएका छन् ।

१५ सय बढी कन्टेनर अझै चीनतर्फ अड्किएका छन् । गत साउन ७ गते बिहान सडक माथिबाट ठूलो पहिरो खसेदेखि अरनिको राजमार्ग सञ्चालन हुन सकेको छैन । सडक खुलाइए पनि जोखिम कायमै रहेकाले क्रमशः सुधार गर्दै लैजाने सडक डिभिजन कार्यालय चरिकोटका प्रमुख नारायणदत्त भण्डारीले बताएका छन ।

वि.सं. २०७२ को भूकम्पले जमिन नराम्ररी चर्किएको कोदारी क्षेत्रमा जतिपटक सडक खुलाए पनि पहिरो झर्ने समस्या दोहोरिइरहने गरेको छ। त्यहाँको पहिरोको दीर्घकालीन समाधानका लागि सडक विभागले भूगर्भविद्हरू खटाएर माटो परीक्षण गरिरहेको छ । भूगर्भविद्हरूले दिएको रिपोर्टका आधारमा दीर्घकालीन समाधान खोजिने सडक विभागको तयारी रहेको छ ।

उता रसुवागढी नाकास्थित ल्हेन्दे खोलाले बगाएको पुलमा अझै पनि बेलिब्रिज राख्न सकिएको छैन । त्यहीकारण मुस्ताङको कोरला नाका पनि खोलिएको अवस्थामा तातोपानीबाट पनि सामान बोकेका कन्टेनर काठमाडौंतर्फ आउन थालेका छन् ।