सप्तकोसी आसपासका बासिन्दालाई सतर्क रहन सुनसरी प्रशासनले आग्रह !

Breaking News

- न्युज नेपाल

काठमाडौं । देशभर लगातार भइरहेको वर्षासँगै सप्तकोसी नदीको जलस्तरमा वृद्धि हुन सक्ने सम्भावना बढेपछि सुनसरी प्रशासनले सप्तकोसी आसपासका बासिन्दालाई सतर्क रहन आग्रह गरेको छ।

शनिबार प्रमुख जिल्ला अधिकारी धर्मेन्द्रकुमार मिश्र, जिल्ला प्रहरी प्रमुख एसपी केशब कुमार थेबे, सशस्त्र प्रहरीका प्रमुख, नेपाली सेनाका प्रतिनिधि तथा जिल्ला विपद् व्यवस्थापन समितिका सदस्यहरूको टोलीले सप्तकोसी ब्यारेजदेखि चतरा पुलसम्म स्थलगत अनुगमन गरेको हो।

अनुगमनपछि एसपी थेबेले अहिले कोशी नदीको बहाब सामान्य रहेको र तत्काल कुनै ठूलो जोखिमको स्थिति नभए पनि निरन्तर निगरानी राखिएको जानकारी दिए। उनका अनुसार विगतका वर्षझैँ आकस्मिक बाढीको सम्भावना नटारिएकाले किनार नजिकका बासिन्दालाई सतर्क रहन आग्रह गरिएको हो।

सुनसरीका प्रमुख जिल्ला अधिकारी मिश्रले बाढीको जोखिम सम्भावित क्षेत्रमा बसोबास गर्ने नागरिकलाई आवश्यक परे सुरक्षित स्थानतर्फ सर्न, राति सचेत रहन र कुनै पनि असामान्य गतिविधि वा नदीको बहाब बढेको अनुभव भए तुरुन्तै नजिकको प्रहरी वा स्थानीय प्रशासनलाई जानकारी दिन आग्रह गरेको छ।