ओलीले जाँचबुझ आयोगलाई दिएकाे बयानका ६ बुँदा सार्वजनिक

Breaking News

- न्यूज नेपाल

काठमाडौं । नेकपा एमालेका सचिव महेश बस्नेतले पार्टी अध्यक्ष केपी शर्मा ओलीले २३ र २४ भदौका घटनाको छानबिनका लागि गठित जाँचबुझ आयोगलाई दिएको बयानका मुख्य बुँदाहरू सार्वजनिक गरेका छन्।

अध्यक्ष ओलीले आइतबार जाँचबुझ आयोगलाई बयान दिएका थिए। बयान लिन आयोगका अधिकारीहरू ओलीको गुण्डुस्थित निवासमा पुगेका थिए।

ओलीले आयोगलाई दिएको जवाफका मुख्य ६ बुँदा बस्नेतले सामाजिक सञ्जालमार्फत सार्वजनिक गरेका हुन्।

बस्नेतका अनुसार ओलीको बयानका मुख्य बुँदाहरू यस प्रकार छन्—

पहिलो, २२ भदौको साँझ राष्ट्रिय सुरक्षा परिषद्को बैठकमा आन्दोलन शान्तिपूर्ण रहने, बल प्रयोग नगर्ने तथा युवा–विद्यार्थीलाई सहयोग गर्ने विषयमा छलफल भएको।

दोस्रो, आन्दोलनमा घुसपैठ र अराजक समूह प्रवेश भएको कुरा आन्दोलनमा संलग्न युवाहरूले नै स्वीकार गरिसकेको।

तेस्रो, आन्दोलनमा सहभागी अधिकांश व्यक्ति ‘जेनजी’ पुस्ताका नभएको कुरा तत्कालीन फोटो तथा भिडियोहरूले प्रस्ट देखाएको।

चौथो, २३ भदौमा तोडफोड र एक्कासि गोली प्रहार सुरु भएपछि गृहमन्त्रीसहित सबै सुरक्षा निकायका प्रमुखहरूसँग छलफल गरी छानबिन समिति गठन गर्ने निर्णय गरिएको।

पाँचौँ, २४ भदौको अवस्था नियन्त्रणमा लिन नेपाली सेना परिचालन गर्ने आवश्यकता देखिए पनि त्यो सम्भव हुन नसकेको।

छैटौँ, गौरीबहादुर कार्कीले घटनाकै दिन तथा त्यसअघि र पछिसमेत सामाजिक सञ्जालमा धारणा सार्वजनिक गरिसकेकाले निष्पक्ष प्रतिवेदन आउने विषयमा आशंका रहेको।