वरिष्ठताको परम्परा तोड्दै डा. मनोज शर्मा प्रधानन्यायाधीशमा सिफारिस, परिषद्मै फरक मत

breaking news

- न्यूज नेपाल

काठमाडौं । संवैधानिक परिषद्ले सर्वोच्च अदालतका न्यायाधीश डा. मनोज शर्मालाई प्रधानन्यायाधीश पदका लागि सिफारिस गरेको छ । बिहीबार बसेको परिषद् बैठकले शर्माको नाम अनुमोदन गरेको हो ।

यससँगै प्रधानन्यायाधीश नियुक्तिमा लामो समयदेखि अभ्यासमा रहेको वरिष्ठतम न्यायाधीशलाई अघि बढाउने परम्परा तोडिएको छ । डा. शर्मा नेपालको ३२ औं प्रधानन्यायाधीश बन्नेछन् ।

तर परिषद्को निर्णय सर्वसम्मत भने हुन सकेन । बैठकमा सहभागी प्रमुख प्रतिपक्षी दलका नेता तथा राष्ट्रियसभाका अध्यक्षले फरक मत राखेका स्रोतले जनाएको छ । उनीहरूले न्यायालयमा स्थापित वरिष्ठताको अभ्यास, संस्थागत निरन्तरता र न्यायपालिकाभित्रको सन्तुलनलाई ध्यान दिनुपर्ने धारणा राखेका थिए ।

यद्यपि प्रधानमन्त्रीसहित बहुमत सदस्यले नेतृत्व क्षमता, कार्यसम्पादन र न्यायिक दृष्टिकोणलाई आधार बनाएर शर्माको नाम अघि बढाएको बताइएको छ ।

परिषद्को निर्णयसँगै न्यायिक तथा राजनीतिक वृत्तमा बहस सुरु भएको छ । एकथरीले यसलाई परम्पराभन्दा क्षमता र नेतृत्वलाई प्राथमिकता दिने कदमका रूपमा व्याख्या गरेका छन् भने अर्काथरीले न्यायपालिकाको स्थापित अभ्यास तोडिँदा संस्थागत असर पर्न सक्ने टिप्पणी गरेका छन् ।

अब शर्माको नाम संसदीय सुनुवाइ समितिमा जानेछ । समितिबाट अनुमोदन भएपछि राष्ट्रपतिले उनलाई प्रधानन्यायाधीशमा नियुक्त गर्ने संवैधानिक व्यवस्था छ ।