आकर्षण म्यानपावरमा तनाव: मलेसिया रोजगारीमा अनियमितताको आरोप, आवेदक आक्रोशित

breaking news

- न्यूज नेपाल

काठमाडौं । आकर्षण म्यानपावरमार्फत वैदेशिक रोजगारीका लागि मलेसियाको जाबेल कम्पनीमा “फ्री भिसा, फ्री टिकट” भन्दै कामदार छनोट प्रक्रियामा अनियमितता भएको गुनासो आएको छ।

पीडितहरूले दिएको जानकारी अनुसार कम्पनीले ३०० जनाको माग रहेको भन्दै अनलाइन फाराम भराएको थियो। तर, फाराम बुझाएका धेरै आवेदकलाई कुनै फोन वा एसएमएस नगरी आफ्नै पहुँचका व्यक्तिहरूलाई मात्र सम्पर्क गरेर प्रि–इन्टरभ्युमा सहभागी गराइएको आरोप लगाइएको छ।

आवेदकहरूको भनाइमा फाराम भरेपछि पनि कुनै जानकारी नदिइएको, कसैलाई सम्पर्क नै नगरिएको तथा स्पष्ट कारणसमेत नदेखाई प्रि–इन्टरभ्यु प्रक्रियाबाट बाहिर राखिएको छ। कार्यालयमा अत्यधिक भीड भए पनि व्यवस्थापनले निष्पक्ष ढंगले प्रक्रिया अघि नबढाएको गुनासो उनीहरूको छ।

यस्तै, त्यहाँ खटिएका प्रहरी कर्मचारीले सुरक्षा व्यवस्थापनभन्दा “साहुको पक्षमा काम गरेको” आरोपसमेत केही आवेदकहरूले लगाएका छन्। उनीहरूका अनुसार प्रहरी प्रशासनले सेवाग्राहीको समस्या सुन्नुको सट्टा “यहाँबाट हट” भन्दै धम्कीपूर्ण व्यवहार गरेको गुनासो गरिएको छ।

पीडितहरूले यस विषयमा सम्बन्धित निकायले निष्पक्ष छानबिन गरी समस्या समाधान गर्नुपर्ने माग गरेका छन्।