गैरकानुनी सम्पत्ति छानबिनका लागि आयोगको सार्वजनिक सूचना

Breaking News

- न्यूज नेपाल

काठमाडौं । प्रधानमन्त्री वालेन्द्र शाह नेतृत्वको सरकारले गठन गरेको सम्पत्ति छानबिन आयोगले गैरकानुनी रूपमा आर्जित सम्पत्तिबारे उजुरी दिन सर्वसाधारणलाई आह्वान गरेको छ। आयोगले सार्वजनिक सूचना जारी गर्दै अस्वाभाविक ढंगले सम्पत्ति आर्जन गरेका सार्वजनिक पदाधिकारी, कर्मचारी तथा अन्य व्यक्तिबारे प्रमाणसहित जानकारी उपलब्ध गराउन आग्रह गरेको हो।

आयोगद्वारा जारी सूचना अनुसार, सार्वजनिक जिम्मेवारीमा रहेका राजनीतिक पदाधिकारी, कर्मचारी वा उनीहरूका परिवारका सदस्य तथा नातासम्बन्ध भएका व्यक्तिको नाममा स्वदेश तथा विदेशमा राखिएको शंकास्पद सम्पत्तिबारे उजुरी दिन सकिने व्यवस्था गरिएको छ।

आयोगले उजुरी दिँदा सम्बन्धित व्यक्तिको नाम, ठेगाना, सम्पर्क विवरण तथा उपलब्ध प्रमाणसमेत उल्लेख गर्न अनुरोध गरेको छ। उजुरी आयोगमा स्वयं उपस्थित भएर, हुलाकमार्फत वा इमेलमार्फत पठाउन सकिने सूचनामा उल्लेख छ।

आयोगले उजुरीकर्ताको नाम, ठेगाना र व्यक्तिगत विवरण गोप्य राखिने पनि जनाएको छ।

सम्पत्ति छानबिन आयोगको कार्यालय केशरमहल, काठमाडौंमा रहेको छ। आयोगले उपलब्ध गराएको सूचनाअनुसार उजुरी सम्बन्धी थप जानकारीका लागि आयोगको कार्यालयमा सम्पर्क गर्न सकिनेछ।