चार उपाध्यक्षले मागे ओलीको राजीनामा, के गर्लान ओली ?

काठमाडौं । नेकपा एमालेका अध्यक्ष केपी ओलीले पार्टीबाट राजीनामा दिनुपर्ने माग उठ्न थालेको छ ।

एमाले सचिवालय बैठकमा चार उपाध्यक्षले ओलीको राजीनामा मागेका हुन्। उनीहरुले पार्टी पुनर्गठन गर्नुपर्ने भन्दै रुपान्त्रण र पुस्तान्तरणको मागसहित ओलीलाई मार्गप्रशस्त गर्नुपर्ने दबाब दिएका हुन्।

पार्टीभित्र नेतृत्व, संगठन पुनर्गठन र आगामी रणनीतिबारे चर्को बहस भएपछि बैठक निष्कर्षविहीन रूपमा स्थगित गरिएको स्रोतले जनाएको छ ।

बैठकमा अधिकांश उपाध्यक्षहरुले पार्टीलाई नयाँ ढंगले पुनर्गठन गर्नुपर्ने आवश्यकता औंल्याउँदै नेतृत्व तहमा व्यापक समीक्षा गर्नुपर्ने धारणा राखेका थिए । उपाध्यक्षहरू विष्णुप्रसाद पाैडेल, पृथ्वीसुब्बा गुरुङ, गोकर्ण विष्ट र रघुजी पन्तले पार्टी कमजोर बन्दै गएको भन्दै संगठन पुनर्गठन, कार्यशैली परिवर्तन र नेतृत्व हस्तान्तरणबारे खुला छलफल आवश्यक रहेको बताएका थिए ।

स्रोतका अनुसार उनीहरुले अध्यक्ष ओलीलाई प्रत्यक्ष रूपमा राजीनामा दिन आग्रह नगरे पनि “मार्गप्रशस्त” गर्नुपर्ने र नयाँ पुस्तालाई जिम्मेवारी हस्तान्तरण गर्ने वातावरण बनाउनुपर्नेमा जोड दिएका थिए ।

बैठकमा रामबहादुर थापा ‘बादल’ भने ओलीको पक्षमा उभिएका थिए । उनले पार्टीभित्र देखिएको समस्या समाधान संवादबाट गर्नुपर्ने भन्दै वर्तमान नेतृत्वको बचाउ गरेका थिए ।

अध्यक्ष ओलीले भने आफूले राजीनामा नदिने स्पष्ट अडान राखेका छन् । उनले पार्टीभित्रकै केही नेताहरू बाह्य शक्तिको प्रभावमा परेर नेतृत्वमाथि अनावश्यक दबाब सिर्जना गर्न खोजिएको टिप्पणी गरेको स्रोतले जनाएको छ ।

बैठकमा नेताहरूबीच लामो समय विवाद र आरोप–प्रत्यारोप चलेपछि थप छलफलका लागि बैठक स्थगित गरिएको बताइएको छ ।

Comments