पत्रकार किशोर श्रेष्ठमाथिको दबाबप्रति विश्व प्रेस काउन्सिलहरूको गम्भीर चिन्ता

काठमाडाैं । वर्ल्ड एसोशिएसन अफ प्रेस काउन्सिल (डब्ल्यूएपीसी)ले वरिष्ठ पत्रकार किशोर श्रेष्ठ माथि भइरहेको भनिएको निगरानी, धम्की, उत्पीडन तथा स्रोत खुलाउन दिइएको दबाबप्रति गम्भीर चिन्ता व्यक्त गरेको छ ।

बुधबार जारी प्रेस वक्तव्यमा संगठनले यस्तो कार्य प्रेस स्वतन्त्रता, स्रोत संरक्षण र लोकतान्त्रिक पत्रकारितामाथिको प्रत्यक्ष आक्रमण भएको जनाएको हो ।

डब्ल्यूएपीसीका द्वितीय उपाध्यक्षसमेत रहेका श्रेष्ठ साप्ताहिक ‘जनआस्थाका प्रधानसम्पादक पनि हुन् । सरकारी अधिकारीहरूसम्बन्धी अनुसन्धानात्मक समाचार प्रकाशन गरेपछि उनीमाथि विभिन्न प्रकारका दबाब र धम्की बढेको संगठनको दाबी छ ।

वक्तव्यमा पत्रकारलाई गोप्य स्रोत खुलाउन बाध्य पार्ने प्रयास लोकतान्त्रिक उत्तरदायित्व र जनविश्वास कमजोर बनाउने कार्य भएको उल्लेख गर्दै यस्ता गतिविधि तत्काल रोक्न माग गरिएको छ ।

डब्ल्यूएपीसीले प्रेस काउन्सिल नेपाल, मानवअधिकार निकाय, सञ्चार क्षेत्रका सरोकारवाला तथा नेपाल सरकारलाई पत्रकार श्रेष्ठको सुरक्षाको प्रत्याभूति गर्न र प्रेस स्वतन्त्रताको पक्षमा उभिन आग्रह गरेको छ ।

डब्ल्यूएपीसीका अध्यक्ष डेभिड ओम्वोयोले ‘स्वतन्त्र र निष्पक्ष प्रेस लोकतन्त्रको आधार हो, पत्रकारले आफ्नो पेशागत कर्तव्य निर्वाह गर्दा कुनै पनि प्रकारको धम्की वा निगरानी सामना गर्न नपरोस्,’ भन्दै नेपालका सम्बन्धित निकायलाई प्रेस स्वतन्त्रताको रक्षा गर्न आह्वान गरेका छन् ।

संगठनले विश्वभरका पत्रकारको सुरक्षाप्रति आफू प्रतिबद्ध रहेको पुनः दोहोर्याउँदै पत्रकारमाथि हुने हरेक प्रकारका हस्तक्षेप र त्रासको विरोध जारी रहने जनाएको छ ।

Comments