सम्पर्कबिहीन कर्मचारीलई तीनदिनभित्र उपस्थित हुन सरकारको अल्टिमेटम

Breaking News

- न्यूज नेपाल

काठमाडाैं । भूमि व्यवस्था, सहकारी तथा गरिबी निवारण मन्त्रालयअन्तर्गत राष्ट्रिय किताबखाना (निजामती) ले अध्ययन बिदा तथा असाधारण बिदामा रहेका केही निजामती कर्मचारीहरू बिदा अवधि समाप्त भइसकेपछि पनि सम्बन्धित कार्यालयमा हाजिर नभएको, लामो समयदेखि कार्यालयको सम्पर्कमा नरहेको तथा व्यक्तिगत विवरण अद्यावधिक नगरेको विषयमा गम्भीर ध्यानाकर्षण भएको जनाएको छ।

मन्त्रालयले बुधबार जारी गरेको सूचनामा अध्ययन बिदा वा असाधारण बिदामा रहेका कर्मचारीहरूले राष्ट्रिय किताबखाना (निजामती) मा आफ्नो अभिलेख अद्यावधिक नगरेको भए सूचना प्रकाशित भएको मितिले तीन दिनभित्र अनिवार्य रूपमा विवरण अद्यावधिक गर्न आग्रह गरेको छ।

त्यस्तै, सबै मन्त्रालय, आयोग, सचिवालय तथा केन्द्रीयस्तरका कार्यालयहरूलाई पनि आफ्ना निकायबाट अध्ययन तथा असाधारण बिदा स्वीकृत भएका कर्मचारीहरूको विवरण, बिदा समाप्तिपछि हाजिर भए/नभएको अवस्था तथा अन्य आवश्यक जानकारी राष्ट्रिय किताबखाना (निजामती) सँग समन्वय गरी तीन दिनभित्र अद्यावधिक गर्न अनुरोध गरिएको छ।

सूचनामा बिदा अवधि सकिएपछि पनि कार्यालयमा हाजिर नभएका वा लामो समयदेखि सम्पर्कविहीन रहेका कर्मचारीहरूको हकमा प्रचलित कानुनबमोजिम आवश्यक कारबाही प्रक्रिया अगाडि बढाउन समेत जानकारी गराइएको छ।

सरकारले निजामती प्रशासनलाई थप व्यवस्थित, पारदर्शी र अभिलेख व्यवस्थापनलाई प्रभावकारी बनाउन यस्तो कदम चालिएको जनाएको छ।