पोखरामा पञ्चासे जोड्ने आधुनिक पहुँच मार्ग र साइकल ट्र्याक निर्माण परियोजना अघि बढ्ने

पोखरा । पोखरा महानगरपालिकाले पर्यटन प्रवर्द्धन, दिगो शहरी यातायात र वातावरणमैत्री पूर्वाधार विकासलाई लक्षित गर्दै नयाँ महत्वपूर्ण परियोजना अघि बढाउने निर्णय गरेको छ।

आज बसेको महानगर कार्यपालिकाको (बोर्ड) बैठकले एसियाली विकास बैंक (एडिबी) को आर्थिक सहयोगमा सञ्चालित क्षेत्रीय शहरी विकास परियोजना तथा शहरी उत्थानशीलता र जीवनयापन सुधार आयोजना (RUDP/URLIP) अन्तर्गत “Access Road with Cycle Track to Panchase Improvement (SP2)” निर्माणका लागि बोलपत्र सम्बन्धी कागजात र संक्षिप्त वातावरणीय अध्ययन प्रतिवेदन स्वीकृत गरेको हो।

१ अर्ब ३० करोड रुपैयाँ लागत अनुमान

उक्त परियोजनाको कुल लागत अनुमान करिब १ अर्ब ३० करोड रुपैयाँ रहेको छ।

परियोजनाअन्तर्गत पञ्चासे पर्यटकीय क्षेत्रलाई जोड्ने विशेष पहुँच मार्ग निर्माण गरिनेछ। यो सडक घाँटीछिना देखि भञ्ज्याङसम्म विस्तार हुनेछ।

साथै, आधुनिक साइकल ट्र्याक निर्माण गरिनेछ भने पर्यटन, अध्ययन तथा अनुसन्धानलाई प्रवर्द्धन गर्ने उद्देश्यले रिसर्च सेन्टर समेत स्थापना गरिने योजना रहेको छ।

यस्तै, महानगरपालिकाले यो परियोजनाले पोखराको पर्यटन प्रवर्द्धनमा उल्लेखनीय योगदान पुर्‍याउने, दिगो शहरी यातायात प्रणालीलाई सहयोग गर्ने तथा वातावरणमैत्री पूर्वाधार विकासलाई सुदृढ बनाउने विश्वास व्यक्त गरेको छ।

यसका साथै पञ्चासे क्षेत्रको जैविक विविधता अध्ययन तथा अनुसन्धानका लागि समेत यो परियोजना महत्वपूर्ण हुने अपेक्षा गरिएको छ।

Comments