ह्वाट्सएपको नयाँ सुविधामा भारतले किन जनायो आपत्ति ?

नयाँदिल्ली । भारत सरकारले अनलाइन ठगी, फिसिङ र नक्कली परिचयमार्फत हुने साइबर अपराध बढ्न सक्ने चिन्ता व्यक्त गर्दै मेटालाई ह्वाट्सएपको नयाँ ‘प्रयोगकर्ता नाम’ (युजरनेम) सुविधा तत्काल सार्वजनिक नगर्न आग्रह गरेको छ। आवश्यक परामर्श र समीक्षा पूरा नभएसम्म उक्त सुविधा लागू नगर्न मन्त्रालयले पत्रमार्फत अनुरोध गरेको भारतीय सञ्चारमाध्यमहरूले जनाएका छन्।

मेटाले हालै प्रयोगकर्ताले आफ्नो फोन नम्बर सार्वजनिक नगरी छुट्टै प्रयोगकर्ता नाममार्फत एकअर्कासँग सम्पर्क गर्न सक्ने सुविधा विश्वव्यापी रूपमा ल्याउने घोषणा गरेको थियो। गोपनीयता बढाउने उद्देश्यले विकास गरिएको यो सुविधाले भारतमा भने ठगी गर्ने समूहलाई नक्कली परिचय बनाएर सर्वसाधारणलाई झुक्याउन सहज बनाउन सक्ने सरकारको आशंका छ।

इलेक्ट्रोनिक्स तथा सूचना प्रविधि मन्त्रालयले मेटालाई पठाएको पत्रमा नयाँ सुविधाले अनलाइन ठगी, फिसिङ र नक्कली परिचयको दुरुपयोग बढ्न सक्ने उल्लेख गरिएको छ। सरकारी अधिकारीलाई उद्धृत गर्दै इन्डियन एक्सप्रेसले विशेषगरी प्राविधिक ज्ञान कम भएका प्रयोगकर्ता नक्कली प्रयोगकर्ता नामको प्रयोगबाट बढी प्रभावित हुन सक्ने जनाएको छ।

भारत ह्वाट्सएपको सबैभन्दा ठूलो बजार मानिन्छ, जहाँ ५० करोडभन्दा बढी प्रयोगकर्ता छन्। पछिल्ला वर्षहरूमा साइबर ठगीका घटना तीव्र रूपमा बढिरहेका छन्। सरकारी तथ्याङ्कअनुसार सन् २०२५ मा मात्रै साइबर ठगीका कारण भारतीय नागरिकले करिब ३ अर्ब अमेरिकी डलर बराबरको आर्थिक क्षति बेहोरेका छन्, जुन सन् २०२१ को तुलनामा करिब ४० गुणाले बढी हो।

यता मेटाले भने उक्त सुविधा भारतमा हालसम्म लागू नभएको स्पष्ट पारेको छ। कम्पनीका अनुसार सार्वजनिक व्यक्तित्व र प्रमाणित खाताका प्रयोगकर्ता नाम पहिले नै सुरक्षित राखिने व्यवस्था गरिएको छ, जसले नक्कली परिचयको जोखिम घटाउन मद्दत गर्नेछ। साथै, प्रयोगकर्ता नामको सुविधा प्रयोग गरे पनि ह्वाट्सएप सञ्चालनका लागि फोन नम्बर अनिवार्य रहने र ठगी नियन्त्रणका लागि बहुस्तरीय सुरक्षा प्रणाली समावेश गरिएको कम्पनीको भनाइ छ।

Comments