विष्णु पौडेलविरुद्ध बिगो दाबीसहित आज पूरक अभियोजन दर्ता गरिँदै, श्रीराम टोबाकोका मालपानी र चुन्नु शर्मालाई के हुन्छ ?

काठमाडौं । सम्पत्ति शुद्धीकरण अनुसन्धान विभागले नेकपा (एमाले) का उपाध्यक्ष तथा पूर्वअर्थमन्त्री विष्णु पौडेलविरुद्ध अनुसन्धान सकेर मुद्दा दर्ताको लागि आज (सोमबार) विशेष सरकारी वकिलको कार्यालयमा प्रतिवेदन बुझाउने भएको छ ।

सम्पत्ति शुद्धीकरणसम्बन्धी प्रकरणमा पौडेलविरुद्ध २० करोड ९० लाख रुपैयाँ बिगो दाबी गर्दै सरकारी वकिलको कार्यालयमा पूरक अभियोजन दर्ता गर्ने तयारी भएको बुझिएको छ ।

प्राप्त जानकारीअनुसार, पौडेल यस प्रकरणमा एक्ला प्रतिवादी होइनन् । दिपक भट्ट र बीमा प्राधिकरणका पूर्व अध्यक्ष सुर्य सिलवालसहित करिव २९ जना विरुद्ध मुद्धा चलाउने प्रतिवेदन सरकारी वकिललाई बुझाउने तयारी छ । स्रोतका अनुसार उनीहरु सबैलाई  अढाइ अर्ब रुपैयाँ बराबरको बिगो दाबीसहित मुद्धा चलाउने तयारी  छ।

यो समाचार तयार पारुन्जेलसम्म श्रीराम टोबाको र त्यसका सञ्चालक कमल मालपानी र चुन्नुप्रसाद पौडेल (चुन्नु शर्मा)  विरुद्ध मुद्धा चलाउने वा नचलाउने भन्ने प्रष्ट भएको छैन । हालसम्म भने कुनै सरकारी कर्मचारीलाई प्रतिवादी बनाइएको जानकारी प्राप्त भएको छैन।

व्यवसायी  मालपानी र चुन्नु शर्मा नेपालका स्थापित व्यवसायी हुन्। उनीहरू खैनी तथा गुट्खालगायत सुर्तीजन्य पदार्थ उत्पादन गर्ने ‘श्रीराम टोबाको’ का उद्यमी तथा व्यावसायिक साझेदार हुन्।हाल यी व्यवसायीहरू नेपालको राजनीति र न्यायिक वृत्तमा विशेष चर्चामा छन्। यिनै व्यवसायीहरूले दिएको बयानका आधारमा सम्पत्ति शुद्धीकरण अनुसन्धान विभागले  एमाले उपाध्यक्ष एवम् पूर्वअर्थमन्त्री पौडेललाई अनुसन्धानको दायरामा ल्याएको थियो।

Comments