आज साँझ ५ बजे न्याय परिषद्को बैठक बस्दै, सर्वोच्च र उच्च अदालतमा न्यायाधीश नियुक्तिको सम्भावना न्यून

काठमाडौं । प्रधानन्यायाधीश पदमा मनोज शर्मा नियुक्त भएपछि न्याय परिषद्को दोस्रो बैठक आज साँझ बस्दैछ । प्रधानन्यायाधीश शर्माले कार्यभार सम्हालेपछि सामान्य चिनजान तथा प्रारम्भिक छलफलपछि दोस्रो न्याय परिषद् बैठक हुन लागेको हो।

न्यायपरिषद्का सदस्यहरुबीच न्यायाधीश नियुक्तिका लागि कुरा नमिलेका कारण सर्वोच्च अदालतका न्यायाधीश, उच्च आलतका मुख्य न्यायाधीश र उच्चका न्यायाधीश नियुक्ति हुने सम्भावना कम रहेको स्रोतले बताएको छ । न्यायाधीशलाई परेको उजुरीका सम्बन्धमा भने आजको बैठकमा छलफल हुने बताइएको छ । सर्वोच्चमा तीन , उच्चका दुई मुख्य न्यायाधीश र उच्च अदालतमा केही न्यायाधीशहरु पदपुर्ति हुन बाँकी छ । उच्च र जिल्ला अदालतका न्यायाधीहरुको पनि सरुवा हुने बेला भएपनि आजको बैठकले यस समबन्धमा कुनै पनि निर्णय नगर्ने बुझिएको छ ।

उच्च अदालतका केही जुनियर तथा कार्यक्षमता कमजोर भएका न्यायाधीशहरुले सर्वोच्च आउने आकांक्षा राख्दै विभिन्न शक्तिकेन्द्र धाएका कारण नियुक्ति ढिलो भएको बुझिएको छ ।प्रधानन्यायाधीश शर्माको नेतृत्वमा साँझ बस्न लागेको बैठकमा परिषद्का नियमित कामकारबाही, न्याय प्रशासनसँग सम्बन्धित विषय तथा आगामी कार्ययोजनाबारे छलफल हुन सक्ने बताइएको छ ।

न्याय परिषद्ले सर्वोच्च अदालतका न्यायाधीश, उच्च अदालतका मुख्य न्यायाधीश तथा न्यायाधीश नियुक्तिका लागि सिफारिस गर्ने संवैधानिक जिम्मेवारी पाएको छ। तर पछिल्लो समय रिक्त पदपूर्तिका विषयमा सहमति जुट्न नसक्दा न्यायाधीश नियुक्ति प्रक्रिया अघि बढ्न सकेको छैन। परिषद्भित्र आवश्यक छलफल र सहमति बनेपछि मात्रै सर्वोच्च र उच्च अदालतका रिक्त पदमा नियुक्ति प्रक्रिया अगाडि बढ्ने देखिएको छ ।

Comments