म्याद सकिएका औषधि व्यवस्थापनमा अनियमितता, फार्मेसी अधिकृतसहित आठ जनाविरुद्ध भ्रष्टाचार मुद्दा

breaking news

काठमाडौं । निजामती कर्मचारी अस्पताल, नयाँ बानेश्वरको फार्मेसी युनिटका फार्मेसी अधिकृत दिपा ढुङ्गानासहित आठ जनाविरुद्ध दुई करोड ९१ लाख ३४ हजार ५४७ रुपैयाँ बराबरको भ्रष्टाचार मुद्दा दायर भएको छ। अख्तियार दुरुपयोग अनुसन्धान आयोगले बुधबार विशेष अदालत काठमाडौंमा उनीहरूविरुद्ध भ्रष्टाचार निवारण ऐन, २०५९ को दफा १७ बमोजिम आरोपपत्र दायर गरेको हो।

आयोगका प्रवक्ता सुरेश न्यौपानेका अनुसार मुद्दा दायर हुनेमा फार्मेसी युनिट इन्चार्ज तथा फार्मेसी अधिकृत दिपा ढुङ्गाना, फार्मेसी सहायक तथा युनिट इन्चार्ज लबेन्द्र कुँवर, वरिष्ठ फार्मेसी सहायक तथा युनिट इन्चार्ज दिनेश पन्त, फार्मेसी सहायक तथा इन्चार्ज दिपक सापकोटा, स्टोर किपर तथा वरिष्ठ फार्मेसी सहायक विनोद पोखरेल र शर्मीला श्रेष्ठ तथा फार्मेसी सहायक केशवराज न्यौपाने र सन्दीप तिवारी रहेका छन्।

आयोगका अनुसार अस्पतालको फार्मेसीमा रहेका म्याद सकिएका तथा म्याद सकिन लागेका औषधि आपूर्तिकर्ता फर्मसँग भएको सम्झौताअनुसार फिर्ता गर्नुपर्ने व्यवस्था भए पनि त्यसो नगरी सार्वजनिक सम्पत्तिको हिनामिना गरी सरकारी सम्पत्तिमा हानि–नोक्सानी पुर्‍याइएको आरोप उनीहरूमाथि लागेको छ। उक्त कसुरमा दुई करोड ९१ लाख ३४ हजार ५४७ रुपैयाँ बिगो कायम गरी सोही बराबरको जरिवाना तथा कैद सजायको मागसहित विशेष अदालत काठमाडौंमा मुद्दा दायर गरिएको आयोगले जनाएको छ