आम्दानी र सिट उपयोगितामा सुधार, निगमलाई आत्मनिर्भर बनाउने तयारी

काठमाडाैं । नेपाल वायुसेवा निगमले नयाँ नेतृत्व पाएसँगै संस्थागत सुधारका कामले गति लिन थालेको जनाएको छ। व्यवस्थापकीय सुधार, कार्यसम्पादनमा जवाफदेहिता र व्यावसायिक दृष्टिकोणलाई प्राथमिकतामा राख्दा निगमको आम्दानी, सिट उपयोगिता र सञ्चालन व्यवस्थापनमा सकारात्मक सुधार देखिएको कार्यकारी अध्यक्ष महेश्वरभक्त श्रेष्ठले बताए।

उनका अनुसार गत जेठ ५ गते खुला प्रतिस्पर्धाबाट छनोट भएका पाँच स्वतन्त्र सञ्चालक तथा मन्त्रालयका दुई प्रतिनिधिसहित सात सदस्यीय सञ्चालक समिति गठन गरिएको थियो। त्यसपछि गत असार ३० गते मन्त्रिपरिषद्को निर्णयबाट आफू महाप्रबन्धकसहित कार्यकारी अध्यक्षमा नियुक्त भएको उनले जानकारी दिए।

कार्यकारी अध्यक्षको जिम्मेवारी सम्हालेपछि तीन वर्षभित्र निगमलाई आत्मनिर्भर बनाउने लक्ष्यसहित काम अघि बढाइएको श्रेष्ठले बताए। जिम्मेवारी सम्हालेको पहिलो १५ दिनमै सञ्चालक समितिका तीनवटा बैठक तथा विभिन्न छलफलमार्फत संस्थागत सुधारका कार्ययोजना, प्राथमिकता र रणनीति तय गरिएको उनको भनाइ छ।

गत आर्थिक वर्षको असार महिनाको तुलनामा यस वर्षको असारमा निगमको आम्दानी करिब ३२ प्रतिशतले वृद्धि भएको श्रेष्ठले बताए। त्यस्तै, गत वर्ष असारमा करिब ७५ प्रतिशत रहेको सिट उपयोगिता यस वर्षको असारमा बढेर ८५ दशमलव ४ प्रतिशत पुगेको उनले जानकारी दिए।

उपलब्ध स्रोत, साधन र जनशक्तिको प्रभावकारी परिचालनमार्फत आम्दानी वृद्धि, अनावश्यक खर्च नियन्त्रण तथा सेवा विस्तारलाई प्राथमिकताका साथ अघि बढाइएको श्रेष्ठले बताए। आगामी दिनमा सेवा सञ्जाल विस्तार, सञ्चालन दक्षता अभिवृद्धि र वित्तीय अनुशासनलाई थप सुदृढ बनाइने तयारी रहेको उनको भनाइ छ।

आफ्नो अनुभव, विज्ञता र अन्तरराष्ट्रिय सम्बन्धको उपयोग गर्दै नेपाल वायुसेवा निगमलाई आत्मनिर्भर, प्रतिस्पर्धी, पारदर्शी र विश्वसनीय राष्ट्रिय ध्वजावाहकका रूपमा स्थापित गर्ने प्रतिबद्धता रहेको कार्यकारी अध्यक्ष श्रेष्ठले बताए।

Comments