लोकतान्त्रिक मूल्य सुदृढ बनाउन अग्रज नेताको आदर्श आत्मसात् गर्नुपर्छः पूर्वराष्ट्रपति भण्डारी

ललितपुर । पूर्वराष्ट्रपति विद्यादेवी भण्डारीले लोकतान्त्रिक मूल्यमान्यता, नैतिकता, सुशासन र जनउत्तरदायित्वलाई सुदृढ बनाउन अग्रज राजनीतिक व्यक्तित्वहरूको आदर्शलाई आत्मसात् गर्न आवश्यक रहेको बताएकी छन्।

तुल्सीलाल अमात्यको २९औँ स्मृति दिवसका अवसरमा तुल्सीलाल स्मृति प्रतिष्ठानले आइतबार ललितपुरको च्यासलमा आयोजना गरेको कार्यक्रममा बोल्दै भण्डारीले नेता अमात्यले आफ्नो सम्पूर्ण जीवन विचार, सिद्धान्त र जनताको सेवामा समर्पित गरेको उल्लेख गरिन्। उनले अमात्यको त्याग, इमानदारी र जनसेवाको आदर्श वर्तमान तथा भावी पुस्ताका लागि प्रेरणाको स्रोत बन्ने विश्वास व्यक्त गरिन्।

भण्डारीले पछिल्ला दिनमा सुनसरीसहित पूर्वी तराईका केही जिल्लामा देखिएका तनाव र हिंसात्मक घटनाप्रति गम्भीर चिन्ता व्यक्त गर्दै नेपाल बहुजातीय, बहुभाषिक, बहुधार्मिक तथा बहुसांस्कृतिक राष्ट्र भएकाले विविधताबीचको एकता, आपसी सम्मान, सहिष्णुता र सामाजिक सद्भाव जोगाउन सबैले संयमता अपनाउनुपर्ने बताइन्।

उनले अफवाह, घृणा र विभाजनका प्रयासबाट टाढा रहँदै राष्ट्रिय एकता, सामाजिक सद्भाव र कानुनी शासन सुदृढ बनाउन सबै नेपालीले जिम्मेवार भूमिका निर्वाह गर्नुपर्नेमा जोड दिइन्। साथै, वर्तमान लोकतान्त्रिक उपलब्धि अमात्यजस्ता अग्रज नेताहरूको लामो सङ्घर्ष, त्याग र समर्पणको परिणाम भएको उल्लेख गर्दै उनका आदर्श र मूल्यलाई व्यवहारमा उतार्नु नै सच्चा सम्मान हुने बताइन्।

कार्यक्रममा प्रतिष्ठानका संस्थापक अध्यक्षसमेत रहेका नेपाल कम्युनिष्ट पार्टी (नेकपा) का सहसंयोजक माधवकुमार नेपाल र पूर्वअध्यक्ष केशवप्रसाद बडाललाई सम्मान गरिएको थियो। साथै हाजिरी जवाफ प्रतियोगिताका विजेतालाई पुरस्कृत गरिएको थियो।

सो अवसरमा पूर्वप्रधानमन्त्रीसमेत रहेका सहसंयोजक माधवकुमार नेपालले तुल्सीलाल अमात्यले सहज र प्रतिष्ठित जीवनको अवसर त्यागेर किसान, मजदुर तथा उत्पीडित समुदायको हक–अधिकारका लागि सङ्घर्षको बाटो रोजेको बताए। उनले अमात्यजस्ता अग्रज नेताहरूको त्याग र समर्पणबाट मुलुकमा लोकतन्त्र स्थापना भएको उल्लेख गर्दै पार्टी निर्माण, किसान आन्दोलन, लोकतान्त्रिक अधिकारको रक्षा तथा शोषण र सामन्ती उत्पीडनविरुद्ध अमात्यले पुर्‍याएको योगदानको संरक्षण र प्रवर्द्धनमा आफूहरू प्रतिबद्ध रहेको बताए।

Comments