उपत्यकामा श्रृंखलाबद्ध सिक्री लुट्ने ‘कर्मा समूह’का नाइकेसहित पाँच पक्राउ

काठमाडौं । उपत्यकाका विभिन्न स्थानमा श्रृंखलाबद्ध रूपमा सुनका सिक्री तथा नगद लुटपाटमा संलग्न ‘कर्मा समूह’का नाइकेसहित पाँच जनालाई प्रहरीले पक्राउ गरेको छ।

जिल्ला प्रहरी परिसर काठमाडौंले आइतबार पत्रकार सम्मेलन गर्दै सिन्धुपाल्चोकका ३४ वर्षीय कर्मा तामाङ, काभ्रेका प्रतिमान गोले, पासाङ घिसिङ, मनोज तामाङ र कास्कीका आले गुरुङलाई पक्राउ गरिएको जनाएको हो।

परिसर प्रमुख प्रहरी वरिष्ठ उपरीक्षक (एसएसपी) दिलीप घिमिरेका अनुसार अनुसन्धानका क्रममा उनीहरूलाई बनेपासहित विभिन्न स्थानबाट पक्राउ गरिएको हो। पक्राउ परेका कर्मा, प्रतिमान र पासाङ यसअघि पनि चोरी तथा डाँकासम्बन्धी मुद्दामा पक्राउ परिसकेका व्यक्ति हुन्।

प्रहरीका अनुसार कर्मालाई बुढानीलकण्ठको भैरव रोड क्षेत्रमा पक्राउ गर्ने क्रममा उनले प्रहरीमाथि खुकुरी प्रहार गर्ने प्रयास गरेपछि दुई राउन्ड हवाई फायर र एक राउन्ड गोली चलाइएको थियो। गोली लागेर घाइते भएका कर्माको राष्ट्रिय ट्रमा सेन्टरमा उपचार भइरहेको छ।

अनुसन्धानबाट उक्त समूहले विशेषगरी बिहान वा साँझ एक्लै हिँडिरहेका महिला तथा वृद्धवृद्धालाई निशाना बनाउने गरेको खुलेको प्रहरीले जनाएको छ। उनीहरूले सुरुमा बाटो सोध्ने बहाना बनाएर संवाद गर्ने र त्यसपछि मोटरसाइकलमा आएर लछारपछार गर्दै घाँटीमा लगाएका सुनका सिक्री तथा नगद लुट्ने गरेका थिए।

एसएसपी घिमिरेका अनुसार घटनापछि प्रयोग गरिएको पल्सर मोटरसाइकलको नम्बर प्लेट परिवर्तन गर्ने, काठमाडौंमा लगातार केही दिन अपराध गरेर १० देखि १५ दिन अन्यत्र लुकेर बस्ने शैली अपनाउने गरेको अनुसन्धानबाट खुलेको छ।

हालसम्म काठमाडौं र काभ्रेमा भएका कम्तीमा चार वटा सिक्री लुटपाटका घटनामा उक्त समूहको संलग्नता पुष्टि भएको प्रहरीले जनाएको छ। समूहले शान्तिनगर, नरेफाँट, धुलिखेल–बनेपा र धापासी क्षेत्रमा लुटपाट गरेको अनुसन्धानबाट खुलेको छ। पछिल्लोपटक साउन ७ गते धापासीमा ६६ वर्षीया वृद्धाको सुनको सिक्री लुटिएको प्रहरीले जनाएको छ।

प्रहरीका अनुसार प्रतिमान गोलेले लुटपाटका क्रममा मोटरसाइकल चलाउने, पासाङ घिसिङले मोटरसाइकल व्यवस्थापन गर्ने, आले गुरुङले प्रतिरोध भएमा ‘ब्याकअप’को भूमिका निभाउने र मनोज तामाङले लुटिएका सुन पगालेर स्वरूप परिवर्तन गर्ने काम गर्ने गरेका थिए।

प्रहरीले समूहबाट लुटपाटमा प्रयोग गरिएको मोटरसाइकल, विभिन्न नम्बर प्लेट, हेल्मेट, ज्याकेट, जुत्ता, सुन पगाल्ने सामग्री, मोटरसाइकलको ह्यान्डल लक तोड्ने औजार, खुकुरी तथा मोबाइल फोन बरामद गरेको छ। घटनाबारे थप अनुसन्धान भइरहेको प्रहरीले जनाएको छ।

Comments