चितवनमा संकलन गरिएका पहिचान हुन नसकेका शव जमिनमुनि व्यवस्थापन गरिने

सबै शवको डीएनए नमूना संकलन गरिने

breaking news

काठमाडौं । रसुवाको भोटेकोशीमा १० भदौमा आएको विनाशकारी बाढीपछि चितवनमा संकलन गरिएका पहिचान हुन नसकेका तथा बेवारिसे शवको व्यवस्थापन गरिने भएको छ। जिल्ला प्रशासन कार्यालय चितवनले शनिबार जारी गरेको सूचनाअनुसार बाढीपछि जिल्लामा हालसम्म २३३ वटा शव संकलन गरिएको छ। तीमध्ये आठवटा शवको पहिचान भइसकेको छ भने बाँकी २२९ वटा शव होल्डिङ सेन्टर तथा विभिन्न स्वास्थ्य संस्थामा राखिएका छन्।

होल्डिङ सेन्टर, स्वास्थ्य संस्था तथा नदी किनारबाट संकलन गरिएका केही शव र शवका अवशेष सडेर–गलेर पहिचान गर्न नसकिने अवस्थामा पुगेको प्रशासनले जनाएको छ। शवको तत्काल व्यवस्थापन नगरिए संक्रमण तथा महामारी फैलिन सक्ने स्वास्थ्य क्षेत्रका विज्ञहरूको राय तथा विश्लेषण रहेको प्रशासनले जारी गरेको सूचनामा उल्लेख छ। यसै अवस्थालाई मध्यनजर गर्दै जिल्ला सुरक्षा समिति चितवनको शनिबार बिहान बसेको बैठकले पहिचान नभएका तथा बेवारिसे शव व्यवस्थापनसम्बन्धी निर्देशिका, २०८३ बमोजिम सबै शवलाई जमिनमुनि व्यवस्थापन गर्ने निर्णय गरेको हो।

शव व्यवस्थापन गर्नुअघि प्रत्येक शवको डीएनए नमुना संकलन गरिनेछ। साथै, प्रत्येक शवलाई संकेत नम्बर प्रदान गरी आवश्यक विवरणसहित अभिलेख सुरक्षित राखिने जिल्ला प्रशासन कार्यालयले जनाएको छ। प्रशासनका अनुसार शव व्यवस्थापनको प्रक्रिया शनिबारदेखि नै भरतपुर महानगरपालिका–९, देवघाटस्थित खुला स्थानमा सुरु गरिनेछ।