भोटेकोशी बाढी प्रभावित ११ हजारभन्दा बढीको उद्धार, तीन हजार ९२५ जना सम्पर्कविहीन

काठमाडौँ। बाढी प्रभावित विभिन्न क्षेत्रबाट हालसम्म ११ हजारभन्दा बढी नागरिकको उद्धार गरिएको छ। राष्ट्रिय विपत् जोखिम न्यूनीकरण तथा व्यवस्थापन प्राधिकरणका प्रवक्ता शान्ति महतले हवाई तथा स्थल माध्यमबाट जोखिममा परेका नागरिकको उद्धार गरिरहेको जनाए । प्रभावित क्षेत्रमा स्थलमार्गबाट खोज तथा उद्धार कार्यलाई नेपाल प्रहरी र सशस्त्र प्रहरी बलले पनि निरन्तरता दिएका छन् ।

उद्धार तथा खोजी कार्यका लागि नेपाली सेना, नेपाल प्रहरी र सशस्त्र प्रहरी बलका २२ हजारभन्दा बढी सुरक्षाकर्मी परिचालन गरिएको छ । जोखिमपूर्ण स्थानमा रहेका नागरिकलाई सुरक्षित क्षेत्रमा स्थानान्तरण गर्नुका साथै बेपत्ता भएकाको खोजीलाई पनि प्राथमिकताका साथ अगाडि बढाइएको छ ।

बाढीबाट प्रभावित माथिल्लो त्रिशूली–१ जलविद्युत् आयोजना क्षेत्रमा पनि खोज तथा उद्धार कार्य जारी छ । आयोजनाबाट हालसम्म २५४ जनाको उद्धार गरिएको छ । आयोजनाको सुरुङभित्र फसेका वा बेपत्ता भएकाको खोजीका लागि नेपाली सेनासहित कोरियाली र चिनियाँ विशेषज्ञ टोली परिचालित छन् ।

प्राधिकरणका अनुसार बाढी तथा पहिरोमा परी हालसम्म ९३९ शव फेला परेका छन् । सबैभन्दा बढी चितवनमा २७९ शव फेला परेका छन् । यस्तै पूर्वी नवलपरासीमा २१६, पश्चिम नवलपरासीमा १६९, नुवाकोटमा ९५, गोरखामा ६५, धादिङमा ५५, तनहुँमा ३८ र रसुवामा २३ शव फेला परेका हुन् ।

बाढी तथा पहिरोमा परी अझै तीन हजार ९२५ जना सम्पर्कविहीन रहेको प्राधिकरणले जनाएको छ । सम्पर्कविहीनको खोजीका लागि सुरक्षाकर्मी तथा उद्धार टोली विभिन्न प्रभावित क्षेत्रमा परिचालन भइरहेका छन् ।

बाढीमा परी २७९ जना घाइते भएका र १६८ जना उपचारपछि अस्पतालबाट डिस्चार्ज भएको जनाइएको छ । प्रभावित क्षेत्रमा नेपाली सेनाले दुई हजार ७०० जनालाई स्वास्थ्य उपचार सेवा प्रदान गरेको प्राधिकरणले जनाएको छ । उद्धार गरिएका मध्ये २५३ जना विदेशी नागरिक छन् ।

Comments