‘सार्वजनिक प्रतिष्ठामा आँच आउनेगरी बनाइयो एमाले अध्यक्ष ओलीको एआई तस्बिर’

Breaking News

काठमाडौं । नेकपा (एमाले) ले पार्टी अध्यक्ष तथा पूर्वप्रधानमन्त्री केपी शर्मा ओलीको सार्वजनिक प्रतिष्ठामा आँच आउनेगरी बनाइएको एआई तस्बिरप्रति गम्भीर ध्यानाकर्षण भएको जनाएको छ । प्रचार तथा प्रकाशन विभाग प्रमुख निरज आचार्यले डिजिटल प्रविधिको दुरुपयोग गरी अराजनीतिक,अनैतिक र आपराधिक क्रियाकलाप गरिएको भन्दै आपत्ति जनाएका हुन् ।

उनले सो खालको अराजक र घृणास्पद गतिविधि तत्काल बन्द गर्न सम्बन्धित पक्षलाई कडा चेतावनी दिएका छन् । ‘डिजिटल प्रविधिको दुरुपयोग गरी पार्टी नेतृत्वको चरित्रहत्या गर्ने नियतका साथ गरिएका यस्ता अराजनीतिक,अनैतिक र आपराधिक क्रियाकलापको घोर निन्दा एवं भर्त्सना गर्दछौं’,सामाजिक सञ्जालमा उनले लेखेका छन्,‘यस्ता अराजक र घृणास्पद गतिविधि तत्काल बन्द गर्न सम्बन्धित पक्षलाई कडा चेतावनी गर्दछौं ।’

त्यसैगरी,उनले सो तस्बिर बनाउनेलाई तत्काल कारबाही गर्न सरोकारवाला निकायको ध्यानाकर्षण गराएका छन् । बाढी प्रभावित क्षेत्रको स्थलगत अवलोकनमा रहेका ओलीको कालोमोसो र जुत्ताको माला लगाइएको एआई तस्बिर सार्वजनिक भएको छ । बुद्ध मगर नामक प्रोफाइलबाट पोष्ट गरिएको सो तस्बिर सामाजिक सञ्जालमा भाइरल छ ।