जनताको जनवाद उल्लेख गरेर पार्टी एकता गरेपछि अनावश्यक गलफत्ति किन गर्नुः भीम रावल

बागमती प्रदेश

- न्युज-नेपाल

काठमाडाैँ । नेपाल कम्युनिस्ट पार्टी (नेकपा) का स्थायी समिति सदस्य भीम रावलले पार्टीको विधानमै जनताको जनवाद भएकाले यसमाथि विवाद सिर्जना गर्न आवश्यक नरहेको बताएका छन्।

आइतबार रिपोर्टर्स क्लब नेपालले आयोजना गरेको साक्षात्कारमा बोल्दै नेता रावलले पार्टीको विधानमै उल्लेख नीतिमाथि अनावश्यक विवाद भइरहेको बताए। ‘शीर्ष नेताबीच जनताको जनवादमा सहमति भएको हो’, उनले भने, ‘कसले र किन पार्टीको नीतिबारे विवाद सिर्जना गरेको हो? मैले बुझ्न सकेको छैन।’

नेकपाको अधिकतम् लक्ष्य वैज्ञानिक समाजवाद भएको र घोषित नीति जनताको जनवाद भएको उनको दावी थियो। नेता रावलले सबैलाई विधानअनुसार चल्न आग्रह गरे। ‘सबै विधानअनुसार चल्नुपर्छ’, उनले भने, ‘सहमति विपरीत गईयो भने राजनीतिक अस्थिरता निम्तिने खतरा हुन्छ।’

पूर्व उपप्रधानमन्त्री समेत रहेका रावलले एकीकरणका बेला भएको सहमति सबैले पालना गर्नुपर्ने बताए। ‘एकीकरणका बेला भएका सहमति सबैले मान्नुपर्छ। यसबाट कोही पनि विचलित हुनुहुँदैन’, उनले भने, ‘‘यदि पार्टीको नीतिबारे कसैलाई चित्त बुझेको छैन भने केन्द्रीय कमिटीमा राखिनुपर्छ।’

गत पुसदेखि केन्द्रीय समितिको बैठक नबसेको भन्दै उनले त्यही कारण बाहिर बोल्दै हिँड्नुपर्ने अवस्था आएको बताए। ‘मैले जे कुरा बोलेको छु, सबै पार्टीको घोषित नीतिअनुसार नै बोलेको छु’, उनले भने।

नेता रावलले सरकारमाथि जनताको ठूलो अपेक्षा रहेको भन्दै जनअपेक्षा अनुसार का मगर्न आग्रह गरे। उनले मन्त्री हेरफेर सामान्य विषय भए पनि अहिले त्यसबारे पार्टीमा कुनै छलफल नभएको बताए।

उनले सरकारको कामको समीक्षापछि मात्रै काम गर्न नसक्नेलाई फिर्ता बोलाउन सकिने बताए। अहिले नै यो र ऊ भन्दा पनि सरकारको कामको समीक्षा पहिला गर्नुपर्छ’, उनले भने, ‘कसैले प्रभावकारी काम गर्न सकेको छैन भने फिर्ता बोलाउनुपर्छ।’