महराको मुद्धा आज पुनरावेदनमा सुनुवाई हुँदै

बागमती प्रदेश

काठमाडाैं । बलात्कार प्रयास आरोपमा कारागार चलान भएका पूर्वसभामुख कृष्णबहादुर महराको आज पुनरावेदनमा सुनुवाई हुन लागेको हो ।

उच्च अदालत पाटनका मुख्यन्यायाधीश नहकुल सुवेदी र न्यायाधीश टेकनारायण कुँवरको इजलासले महराको पुनरावेदन निवेदनमा बिहीबार सुनुवाइ गर्न लागेको हो।

संसद सचिवालयमा कार्यरत कर्मचारी रोशनी शाहीमाथि बलात्कार प्रयासको आरोपमा काठमाडाैं जिल्ला अदालतले उनलाई पुर्पक्षका लागि थुनामा पठाउने आदेश दिएको थियो ।

यसअघि महराले आफूलाई थुनामा राख्ने जिल्ला अदालत काठमाडौंको आदेश बदर गर्न माग गर्दै उच्च अदालत पाटनमा निवेदन दिएका थिए । सोही निवेदनमा सुनुवाइ गर्दै मुख्यन्यायाधीश नहकुल सुवेदीको इजलासले कैफियत प्रतिवेदन दिन आदेश गरेका थिए।

कैफियत प्रतिवेदन भनेको अभियुक्तको जाहेरी देखि थुनामा पठाउने आदेशसम्म को विस्तृत विवरण हो। त्यसबाहेक महाराको मुद्दाको मिसिल पनि उक्त इजलासले मगाएको थियो।

पक्राउ परेको एक महिनामा महरालाई जिल्ला अदालत काठमाडौंले तत्काल प्राप्त प्रमाणका आधारमा थुनामा पठाउने आदेश गरेको थियो।

असोज १२ गते राति महरा आएर पहिले रक्सी खाएको त्यसपछि बलात्कार प्रयास गरेको रोशनीले प्रहरी समक्ष लिखित जाहेरी दिएकी थिइन् । भने, उनै शाहीले पुनः महराले आफूलाई कुनै दुर्व्यवहार नगरेको भन्दै अदालतमा निवेदन समेत दिएकी छन् ।