प्रधानन्यायाधीशमाथि महाअभियोग प्रस्ताव ल्याउन माग गर्दै सभामुखलाई ज्ञापनपत्र बुझाईंदै

समाचार

- न्युज नेपाल

काठमाडाैँ । न्यायपालिका शुद्धीकरण र विसंगति अन्त्यको माग गर्दै आन्दोलनमा रहेका कानून व्यवसायीहरुले सोमबार सभामुखलाई ज्ञापनपत्र बुझाउने भएका छन् ।

नेपाल बार एशोसिएसनका तर्फबाट सोमबार २ बजे सभामुख अग्निप्रसाद सापकोटालाई ज्ञापनपत्र बुझाउन लागेको हो ।

नेपाल बार एशोसिएसनका उपाध्यक्ष रक्षा बस्यालका अनुसार प्रधानन्यायाधीशमाथि महाअभियोग प्रस्ताव ल्याउन माग गर्दै ज्ञापनपत्र बुझाउन लागिएको हो । वर्तमान प्रधानन्यायाधीश चोलेन्द्रशमशेर जबराकै कारण न्यायपालिकामाथिको विश्वास गुम्न थालेको र अदालतमा विसंगति मौलाएको भन्दै नेपाल बार एशोसिएसनले प्रधानन्यायाधीशको राजीनामा माग गर्दै आएको छ ।

प्रधानन्यायाधीशले राजीनामा नदिएसम्म आन्दोलन जारी राख्ने र प्रधानन्यायाधीशको इजलासमा बहस समेत नगर्ने बताइसकेको नेपाल बारले प्रधानन्यायाधीशलाई विदा गर्नुपर्ने आधार, कारण र आरोपसहितका ज्ञापनपत्र सभामुखलाई बुझाउन लागेको हो ।

बारले सोमबार दिउँसो २ बजे सभामुख अग्निप्रसाद सापकोटाको कार्यकक्ष सिंहदरबारमा भेट गरी ज्ञापनपत्र बुझाउन लागेको हो । उपाध्यक्ष बस्यालका अनुसार सोमबार नै विभिन्न राजनीतिक दलका संसदीय दलको कार्यलयमा समेत गई प्रधानन्यायाधीशमाथि महाभियोग लगाउनुपर्ने आधार र आरोपसहितको ज्ञापनपत्र बुझाउने कार्यक्रम रहेको छ ।