प्रदेश १ : जसपाको १ सिट निर्णायक,कसले मार्ला बाजी ?

राजनीति

- न्युज नेपाल

विराटनगर । प्रतिनिधिसभाको निर्वाचन सकिएर अन्तिम मतपरिणाम आएपछि देशको राजनीतिक परिवेश फेरिन खोज्दैछ । केन्द्रदेखि प्रदेशसम्म कस्तो सरकार बन्ला भन्ने आमचासो छ । यसैक्रममा देशका ७ वटै प्रदेशमध्येमा प्रदेश १ मा सरकार बनाउने प्रयास रोचक हुने देखिएको छ । यस प्रदेशमा सरकार पक्षका गठबन्धन दल र एमाले-राप्रपा बराबरी सिटमा देखिएका छन् ।

९३ सीट रहेको प्रदेशसभा १ मा बहुमतका लागि ४७ सिट आवश्यक पर्छ । अहिलेसम्म हेर्दा गठबन्धन दल र एमाले-राप्रपा गठबन्धनको ४६/४६ सिट देखिएको छ । उता जसपा एक सिटमा सीमित छ । दुवै समूलाई सरकार बनाउन एक/एक सिट आवश्यक देखिएको छ । जसपाले प्रदेशसभामा समानुपातिकबाट पाएको एक सिटले कताको पक्ष लिने हो, त्यो भने हेर्न बाँकी छ ।

वर्तमान सरकारमा रहेका र नरहेका दुवै गठबन्धन सरकार बनाउन जसपाको आशमा देखिन्छन् । दुवै धार कसरी हुन्छ जसपालाई रिझाएर सरकारको बाजी मार्ने दाउमा छन् । तर, निर्णायक मत लिएर बसेको जसपाभित्र एक पक्ष एमालेको नेतृत्वमा बन्ने सरकारमा जानुपर्ने अडानमा छ । अर्कोपक्ष भने सत्ता गठबन्धनसँगै मिलेर सरकार बनाए दिगो हुने अडान राखिरहेको छ ।

जसपा प्रदेश १ सरकार गठनमा ‘कि फ्याक्टर’ को रूपमा देखिएको छ । यस पार्टीभित्र पनि कसलाई साथ दिने भन्ने दुई धार छ । जसपाले जुन गठबन्धनलाई साथ दिन्छ उसैले सरकाररुपी पोष्टमा गोल छिराउने देखिएको छ । जसपा औपचारिक निर्णयमा अहिलेसम्म नपुग्दा सत्ता समीकरणको तालमेलबारे उक्त पार्टीभित्र गहन छलफल वा विवाद रहेको प्रष्टै हुन्छ ।

उपेन्द्र यादवले एमालेसँगको सहकार्य सकिएको बताएका छन् । तर अर्कातिर याे अवस्था छ कि एमालेकै साथ पाएर प्रभावशाली नेता अशोक राईले प्रतिनिधिसभा सदस्यमा चुनाव जितेका छन् । राईले भने पार्टीको आधिकारिक निर्णय नभएको प्रतिक्रिया दिएका छन् । उनले यादवको भनाइ आधिकारिक नभएको पनि जनाएका छन् ।

एमालेसँग तालमेल गरेकैले अशाेक राईले चुनाव जितेका हुन् । यस अवस्थामा उसलाई लगत्तै धोका दिन नहुने जसपाभित्रको एउटा धारको तर्क छ । अर्को धारले भने पार्टीलाई जे फाइदा हुन्छ र जसको सरकार दिगो हुन्छ उसैलाई सहयोग गर्नुपर्ने अडान राख्दै आएको छ । वास्तवमा एक सिट हातमा लिएर बसेको जसपाको निर्णय कसको पक्षमा हुने हो ?प्रदेश सरकार कसले बनाउने हो त्यो आगामी दिनका राजनीतिक गतिविधिले नै देखाउने छन् ।