किन हटाइयो मुस्लिम र थारुलाई मधेशीको सूचीबाट ?

राजनीति

- न्यूज नेपाल

काठमाडौं । मुस्लिम र थारुलाई मधेशीको सूचीबाट हटाइएको छ । सरोकारवाला संवैधानिक आयोगहरुले नै हामी मधेशी होइनौं भनेपछि सूचीबाट हटाइएको मधेशी आयोगका पदाधिकारीहरुले जनाएका छन् । मधेशी आयोगद्वारा गरिएको ‘नेपालमा मधेशी समुदायको थर सूचीकरण–२०७८’को उपसमूह–१ मा थारु र २ मा मुस्लिमलाई राखिएको थियो । सूचीकरणको आधारमा मधेशी आयोगले मुस्लिम र थारु समुदायलाई पनि मधेशीको रुपमा परिभाषित गर्न सरकारलाई सिफारिस गरेको थियो ।

आयोगले गत असोज ३१ गते राष्ट्रपति विद्यादेवी भण्डारीलाई बुझाएको चौथो वार्षिक प्रतिवेदनमा थारु र मुस्लिमसहित १४९ जातिलाई मधेशीमा परिभाषित गर्न सिफारिस गरेको गरेको थियो । तर थारु र मुस्लिम समुदायले त्यसको सशक्त विरोध गरे । विरोध मात्रै हाइन, थारु र मुस्लिम आयोगले नै मधेशीको सूचीबाट आफूहरुलाई हटाउन मधेशी आयोगमा निवेदन समेत दिएका थिए ।

थारु र मुस्लिमको विरोधपछि थारु र मुस्लिमलाई मधेशीको सूचीबाट हटाएको मधेशी आयोगले जनाएको छ । निर्णय कार्यान्वयन गर्नका लागि प्रधानमन्त्री तथा मन्त्रिपरिषद्को कार्यालयलाई पत्र पठाएको पनि आयोगका पदाधिकारीले सञ्चारकर्मीलाई जानकारी दिएका छन् ।