‘चुनावअघि नैं कांग्रेसँग आलोपालोमा सरकार चलाउने सहमति ’

राजनीति

- न्यूज नेपाल

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले बाहिर आएजस्तो प्रधानमन्त्री पदमा आफ्नो दाबी नभएको प्रष्टीकरण दिएका छन् । उनले अवसर आए जिम्मेवारी लिनसक्ने पनि जनाए । प्रेस सेन्टर नेपाल चितवनले आयोजना गरेको पत्रकार सम्मेलनमा उनले सत्तागठबन्धनमा सहमति र समझदारीबाटै प्रधानमन्त्री टुंगिने विश्वास दिलाए । चुनावअघि कांग्रेसँग आलोपालो सहमति भने भएको उनले खुलासा गरेका छन् ।

‘प्रधानमन्त्री माओवादीको बटमलाइन नभएको बताउँदै उनले सहमति र समझदारीबाटै टुंग्याउने जनाए । सहमतिमै जिम्मेवारी आयो भने लिने र चुनावअघि आलोपालो गर्ने सहमति भएको र अहिले पनि त्यो समझदारी रहेको जनाए । कांग्रेसले आफ्नै नेतृत्वमा सरकार बनाउने निर्णय गरेपनि त्यो गठबन्धनमा समझदारीकै आधारमा हुने प्रचण्डको भनाइ छ ।

एमालेसँगको तालमेलको सम्भावनालाई उनले नकारेनन् । कांग्रेसले प्रधानमन्त्री नदिए एमालेसँग मिलेर सरकार चलाउने दाउसम्बन्धी पत्रकारको प्रश्नमा उनले स्वभावैले निर्वाचनपछि सबै राजनीतिक दलसँग छलफल चलेको जनाए । आफूले अहिलेसम्म प्रधानमन्त्रीका निम्ति सबै चिज दाउमा लगाउने काम कहिल्यै नगरेको प्रचण्डको जिकिर थियो।

माओवादीमात्र नभए गठबन्धनका सबै दलहरूको एमालेसँग संवाद भइरहेको भन्दै उनले कांग्रेस र एमालेकै पनि भइरहेको बताए । राष्ट्रपति, उपराष्ट्रपति, सभामुख, उपसभामुख र प्रधानमन्त्री प्याकेजमै टुंग्याउने भन्दै उनले राष्ट्रपतिबाट आव्हान भएको ७ दिनकै समयसीमामा टुंगिने आश्वासन दिएका छन् ।