मिटरब्याज पीडितलाई खुलामञ्च प्रवेश गर्न काठमाडौं महानगरपालिकाको रोक

अर्थ र बाणिज्य

- न्यूज नेपाल

काठमाडौं । काठमाडौं महानगरपालिकाले मिटरब्याज पीडितलाई खुलामञ्च प्रवेश गर्न रोक लगाएको छ। सरकारसँग न्यायको माग गर्दै काठमाडौं आइपुगेका आठ जिल्लाका मिटरब्याज पीडितहरू सोमबार साँझ खुलामञ्च प्रवेश गर्न खोजेका थिए । तर नगर प्रहरीले उनीहरुलाई गेटमा रोकेको हो। आक्रोशित मिटरब्याज पीडितले मेयर बालेन्द्र मेयर शाहविरुद्ध नाराबाजी गरे। खुला मञ्चमा बिरोध कार्यक्रम गर्न आइतबार नै महानगरका मेयर र जिल्ला प्रशासन कार्यालयमा अनुमति माग गरेको तर सुनुवाई नभएको मिटरब्याज पीडितहरुको गुनासो छ।

यता मेयर शाहले मिटरब्याज पीडितलाई खुलामञ्चको सट्टा शान्तिवाटिकामा बस्ने प्रस्ताव गर्नु भएको छ । मेयर शाहले मिटरब्याज पीडितलाई पशुपति धर्मशालामा बस्न आग्रह गरेको तर नमानेको बताउनु भयो । ‘काठमाडौ बसुन्जेल पशुपति धर्मशालामा बास र खानाको व्यवस्थापन गर्न हामी तत्पर भएर सोमबार बिहानै उहाँहरुसँग सम्पर्क गरेर हामीले पशुपति जान आग्रह गर्‍यौं’ उहाँ सामाजिक सञ्जाल फेसबुकमा लेख्नुहुन्छ,’तर उहाँहरु खुल्लामन्च मै बस्न खोज्नु भयो । हामीले सम्झाएर रत्नपार्कको शान्तिबाटिकामा आन्दोलन गर्न प्रबन्ध गरेको छौं ।’

मेयर शाहले मिटरब्याज पीडितप्रति ऐक्यवद्धता रहेको भन्दै उनीहरुको माग पूरा गर्न सरकारलाई आग्रह गर्नु भएको छ ।‘हामी चाहन्छौं यस्तो अवस्थामा काठमाडौं कोही आउन नपरोस्, गाउँगाउँमा सरकार पुगोस्’ मेयर शाहले फेसबुकमा लेख्नु भएको छ । उनीहरुको माग पूरा गर्न मेयर शाहले सरकारलाई आग्रह पनि गर्नु भएको छ ।