नेप्से बढ्ने क्रम साताको चौथो कारोबार दिन पनि कायमै

अर्थ र बाणिज्य

- न्यूज नेपाल

काठमाडौं । नेप्सेको उकालो यात्राले साताको चौथो कारोबार दिन पनि निरन्तरता पाएको छ । अघिल्लो दिन तीन दशमलव ३१ अंकले बढेको नेप्से आज बुधबार पुनस् २३ दशमलव ३९ अंकले बढेर १८ सय ५४ दशमलव एक अंकमा चढेको छ । यसैगरी सेन्सिटिभ इन्डेक्स पनि चार अंकले बढेर तीन सय ५२ दशमलव ९४ अंकमा चढेको छ । नेप्सेमा आज दुई सय ६६ वटा कम्पनीहरुको २५ हजार छ सय ३४ पटकको कारोबारमा २५ लाख ७७ हजार दुई सय १० कित्ता सेयर खरिद बिक्री भएकोमा कुल कारोबार रकम ८५ करोड ७६ लाख २४ हजार तीन सय १८ रुपैयाँ पुगेको छ ।

नेप्सेमा आज १३ वटा समूहहरुको कारोबार भएकोमा १३ वटै समूहहरुको सूचक बढेर नेप्से पुरै हरियो भएको छ । जसमध्ये वाणिज्य बैंक समूहको सूचक आठ दशमलव ६५ अंकले बढेर १२ सय नौ दशमलव १२ अंकमा पुगेको छ भने विकास बैंक समूहको सूचक पनि ५४ दशमलव ९३ अंकले बढेर तीन हजार चार सय २० दशमलव ३१ अंकमा पुगेको छ । फाइनान्स समूहको सूचक पनि ३४ दशमलव ५६ अंकले बढेर १५ सय ५२ दशमलव २३ अंकमा पुगेकोमा जलविद्युत समूहको सूचक पनि ४९ दशमलव २८ अंंकले बढेर २२ सय ९८ दशमलव ७१ अंकमा पुगेको छ ।

यसैगरी जीवन बिमा समूहको सुचक पनि ९३ दशमलव ३७ अंकले बढेर नौं हजार दुई सय ९६ दशमलव २३ अंकमा चढेकोमा निर्जिवन बिमा समूहको सूचक पनि एक सय ७१ दशमलव २३ अंकले बढेर आठ हजार छ सय १४ दशमलव ३१ अंकमा पुगेको छ । यि बाहेक होटेल तथा पर्यटन, लगानी, उत्पादनमुलक, लघुवित्त, सामुहिक लगानी कोष, अन्य र ट्रेडिङ समूहहरुको सूचक पनि बढेका छन् ।

नेप्सेमा आज आत्मनिर्भर लघुवित्त वित्तीय संस्थाको प्रतिकित्ता सेयर मूल्य नौ दशमलव ९९ प्रतिशतले बढेर नौ सय ३३ रुपैंयाँ ४० पैसा अन्तिम मुल्यमा प्रतिकित्ता सेयर कारोबार हुँदा माईखोला हाइड्रो पावर कम्पनीको प्रतिकित्ता सेयर मूल्य सात दशमलव ९३ प्रतिशतले घटेर दुई सय ७७ रुपैयाँ ६० पैसा अन्तिम मूल्यमा प्रतिकित्ता सेयर कारोबार भएको छ । शिवम् सिमेन्टको भने आज चार सय तीन रुपैंयाँ ५० पैसा अन्तिम मुल्यमा पाँच करोड ४४ लाख ५६ हजार नौ सय ३५ रुपैयाँको सेयर कारोबार भएको छ । यो आज भएका कम्पनीहरुको कारोबार रकम मध्येमा सबैभन्दा बढी हो ।