सत्ता गठबन्धनको बैठक जारी, जनमत पार्टीलाई सरकार ल्याउने विषयमा पनि छलफल

राजनीति

- न्यूज नेपाल

काठमाडौं । सत्ता गठबन्धनको बैठक सुरु भएको छ । प्रधानमन्त्री पुष्पकमल दाहाल प्रचण्डले बोलाएको बैठक बालुवाटारमा जारी छ । बैठकमा पछिल्ला समसायिक राजनीतिक घटनाक्रमबारे छलफल हुने प्रधानमन्त्रीको प्रेस सल्लाहकार गोविन्द्र आचार्यले बताए ।

बैठकमा जनमत पार्टीलाई सरकार ल्याउने विषयमा पनि छलफल हुने बताइन्छ। आइतबार जनमत पार्टीका अध्यक्ष डा। सिके राउतसँग प्रधानमन्त्रीले प्रचण्डले गठबन्धन दलसँग सहमति गरेर सरकारमा ल्याउने आश्वासन दिएका थिए ।

बैठकमा कोशी प्रदेशमा नयाँ सरकार गठनको विषय पनि छलफल हुने उनले बताए । गत पुस २४ गते मुख्यमन्त्री बनेका नेकपा एमालेका संसदीय दलका नेता हिक्मत कार्कीले प्रदेश सभा बैठकमा शुक्रबार विश्वासको मत नपाएपछि नयाँ सरकार गठनको लागि आह्वान भएको छ ।

कोशी प्रदेशमा ९३ सदस्य रहेका छन् । बहुमत पु¥याउन ४७ सीट चाहिन्छ । राप्रपाले एमालेसँगको गठबन्धन नछोडेको अवस्थामा विपक्षी गठबन्धनको बहुमत पुग्न सक्ने अवस्था छैन ।

एमालेको ४० र राप्रपाको ६ गरी ४६ सांसद छन् । नेपाली कांग्रेसको २९, माओवादीको सभामुखबाहेक १२ सीट, नेकपा एसको ४ र जसपाको १ गरी गठबन्धनसँग पनि ४६ नै सीट छ ।

नयाँ सरकारलाई लागि गठबन्धनमा पनि सहजै गणित पुग्ने अवस्था छैन । यहाँ गठबन्धनलाई सरकार गठनको लागि राप्रपाको साथ चाहिन्छ । तर, कोशी सरकारको नेतृत्व गर्दै कांग्रेस र माओवादी केन्द्रका नेताहरु काठमाडौं आएर शीर्ष नेताकहाँ धाइरहेका छन् ।