बालुवाटार पुगेका सभामुखलाई प्रधानमन्त्रीले भनेः संसद् अवरोध हटाउन लागिपरेको छु, विपक्षी दलको नेतासँग थप पहल गर्छु

राजनीति

- न्युज नेपाल

काठमाडाैँ । सभामुख देवराज घिमिरेले प्रधानमन्त्री पुष्पकमल दाहाल प्रचण्डसँग छलफल गरेका छन् ।

सदनको जारी गतिरोध फुकाउन उनले छैटौं पटक प्रधानमन्त्री प्रचण्डसँग छलफल गरेका हुन् । प्रधानमन्त्री निवास बालुवाटारमा भएको छलफलमा उनले प्रधानमन्त्रीसँग लामो समय सदन अवरुद्ध हुनु राम्रो नभएको बताएको उनको सचिवालयले जनाएको छ ।

सचिवालयका अनुसार सदन खुलाउन सत्तापक्ष र प्रतिपक्षले गम्भीरतापूर्वक छलफल गरिदिन उनले प्रधानमन्त्री प्रचण्डसँग आग्रह गरेका थिए । ‘सदन नचल्नु राम्रो भएन । दलीय सहमतिविना सदन अगाडि बढ्न सक्ने स्थिति छैन,’ भेटमा प्रधानमन्त्रीसँग सभामुखले भने, ‘आम जनताले पनि सदन अवरोधलाई राम्रो मानेका छैनन् । कम्तिमा सदन खुलाउन सत्तापक्ष र प्रतिपक्षले गम्भीरतापूर्वक छलफल गरिदिनुहोस् । सभामुखको रूपमा मैले सहमतिका लागि जिम्मेवारीपूर्वक पहल गरेको छु । तर, परिणाममा निस्किन सकेन । शीर्ष नेताहरू नै घण्टौं बस्दा पनि सहमति भएन ।’

जवाफमा प्रधानमन्त्री प्रचण्डले सदन खुलाउन आफूले भूमिका खेल्ने बताएका थिए । उनले प्रमुख विपक्षी दलको नेतासँग थप पहल गर्ने बताएका थिए । ‘म पनि सदन खुलाउन भूमिका खेल्छु । तपाईं पनि लाग्नुहोस्,’ प्रधानमन्त्री प्रचण्डले सभामुखसँग भने, ‘छिट्टै सहमति गर्नैपर्छ । म प्रमुख विपक्षी दलको नेतासँग थप पहल गर्छु ।’

Comments

प्रकाशित मिति : 2023-08-18

Comments

अरु समाचार