चाडवाड लक्षित बजार अनुगमनमा १५ टोली परिचालन गरिदै

अर्थ र बाणिज्य

- न्युज नेपाल

काठमाडौं। चाडबाडले बजारलाई चलायमान बनाए पनि सँगसँगै भित्रिने अँध्यारो पाटो हो–कालो बजारी । त्यसैको मौका छोप्दै केही व्यवसायीले बढी मूल्य लिने , म्याद नाघेका सामान बेच्नेलगायत ठगीका घटना हुने गरेका छन् । चाडवाडमा उपत्यका छाड्ने सर्वसाधारणलाई यातायात व्यावसायी , राजमार्गका होटल व्यवसायीले पनि ठग्ने गरेको गुनासो छ ।त्यसैलाई दृष्टिगत गरी वाणिज्य आपूर्ति तथा उपभोक्ता संरक्षण विभागले असोज १ देखि चाडबाड लक्षित अनुगमन गर्न लागेको छ ।

दसैं आउन करिब सामान्य डेढ महिना बाँकी छँदा चाडबाडलाई लक्ष्य गर्दै अनुगमनलाई तीव्र बनाउन संघीय मामिला तथा सामान्य प्रशासन मन्त्रालयमा कर्मचारीसमेत माग गरिएको छ ।नियमनकारी निकाय , खाद्य प्रविधि तथा गुण नियन्त्रण विभाग, गुणस्तर तथा नापतौल विभाग , राजस्व विभाग, आन्तरिक राजस्व विभाग, कृषि पशुलगायत विभागलाई कर्मचारी माग गरिएको जनाएको छ। वाणिज्य विभागका अनुसार यस वर्ष कम्तीमा १० टोलीबाट बजार अनुगमन हुनेछ । सबै नियमनकारी निकायसँगको सहकार्यमा अनुगमन टोलीको संख्या १५ सम्म पुर्‍याइने विभागका महानिर्देशक गजेन्द्रकुमार ठाकुरले बताए । १० टोली खटाउन कम्तीमा ३० जना कर्मचारी चाहिन्छ । विभागका १०÷१२ जना मात्रै छन् । उनले भने थप कर्मचारीका लागि संघिय मामिला तथा सामान्य प्रशासन मन्त्रालयसँग समन्वय गरिरहेका छौ ।

सबै निकायसँगको छलफलपछि संयुक्त बजार अनुगमनलाई तिव्रता दिइने छ । ‘ चाडबाडमा बजारको अवस्था , अनुगमनबारे वाणिज्य तथा आपूर्ती सचिव मधु मरासिनीको अध्यक्षतामा छिट्टै बैठक बस्छौ । सबै निकायले आ–आफ्नो क्षेत्रमा अनुगमन गर्छन् , सँगै आवश्यकता अनुसार संयुक्त अनुगमन पनि हुन्छ‘ महानिर्देशक ठाकुरले भने ।

चाडबाड लक्षित अनुगमन गत वर्ष पनि असोज १ गते बाट भएको थियो । कात्तिक मसान्तसम्म १ हजार ७७ वटा व्याकसायिक फर्ममा अनुगमन गरिएको वाणिज्यले जनाएको छ । अनुगमन का क्रममा २ सय २९ व्यावसायिक फर्म कारबाहिमा परेका थिए । तिनबाट २९ लाख ६५ हजार जरिवाना असुल गरिएको थियो ।
सरकारले चाडवाडलाई मात्रै केन्द्रमा राखेर अनुगमन गर्ने गरेको आरोप लाग्ने गरेको छ ।सिजनका बेला अनुगमनले व्यापारमा समस्या हुने गरेको व्यवसायीको गुनासो छ । अनुगमन चाडबाड लक्षित मात्रै नभई १२ महिनै हुनुपर्ने उपभोक्ता अधिकारकर्मी बताउँछन् ।