डेकेन्द्र थापा स्मृति पत्रकारिता पुरस्कार महेश केसीलाई

समाचार

- न्युज नेपाल

काठमाडौं । प्रेस चौतारी नेपालले यस वर्षको डेकेन्द्र थापा स्मृति पत्रकारिता पुरस्कार रुकुमपूर्वका महेश केसीलाई प्रदान गर्ने भएको छ।

त्यस्तै, प्रेस चौतारी नेपालले यस वर्षको हृदयचन्द्रसिंह प्रधान स्मृति पत्रकारिता पुरस्कार अन्नपूर्ण पोस्ट्का प्रधान सम्पादक अखण्ड भण्डारीलाई दिने निर्णय गरेको छ। अग्निशिखा स्मृति पत्रकारिता पुरस्कार सिन्धुपाल्चोकका पत्रकार माधव नेपाललाई दिने निर्णय गरेको छ। फणिदेव महत वीरेन्द्रकुमार साह क्रियाशील पत्रकारिता पुरस्कारका लागि चयन भएका छन्।

त्यस्तै, चन्द्र न्यौपाने शान्तिराम कार्की स्मृति पत्रकारिता पुरस्कार रामेछापकी यसिमा महत र सावित्रीदेवी– पद्मलक्ष्मी बस्नेत स्मृति पत्रकारिता पुरस्कार काभ्रेकी काजल तामाङलाई प्रदान गरिने भएको छ।

पत्रकार गोबिन्द पोखरेलको संयोजकत्वमा चौतारीका महासचिव हिरामान लामा र सचिव हरिबल्ल्भ नेपालको निर्णायक मण्डलले विभिन्न चरणमा बैठक गरी उक्त पुरस्कार छनोट गरेको हो। अग्रज पत्रकारको सम्मान र क्रियाशीलको प्रोत्साहनका लागि स्थापित यी पुरस्कार संगठनको २६औं स्थापना दिवसमा माघ २२ गते प्रदान गरिने अध्यक्ष गणेश बस्नेतले जानकारी दिए।