चिनियाँ नयाँ वर्षको अवसरमा काठमाडौंमा साँस्कृतिक महोत्सव

विश्व प्रवास

- न्यूज नेपाल

काठमाडौं । चिनियाँ राजदूतावासले चीनको नयाँ वर्षको उपलक्ष्यमा नेपालमा विभिन्न कार्यक्रम गरी साँस्कृतिक महोत्सव मनाइरहेको छ । सोही सिलसिलामा माघ २४ गते रत्नपार्कमा दीप प्रज्वलन गरेर नयाँ वर्ष मनाइएको थियो ।

फेब्रुअरी ७ मा पहिलो चिनियाँ नयाँ वर्ष ‘लाइट शो’ को उद्घाटन समारोह आयोजना गरिएको थियो।

संस्कृति, पर्यटन तथा नागरिक उड्डयनमन्त्री सुदन किराती प्रमुख अतिथि रहेको कार्यक्रममा नेपालका लागि चिनियाँ राजदूत चेन सोङले सम्बोधन गरेका थिए । कार्यक्रममा चिनियाँ कलाकारले सांगीतिक प्रस्तुति दिएका थिए । नयाँ वर्षको अवसरमा दूतावासले फेब्रुअरी २१ सम्म रत्नपार्कमा दीप प्रज्वलन तथा विभिन्न कार्यक्रम जारी रहने बताएको छ ।

नेपाली जनतासँग ड्रयागन वर्षको वसन्त चाड मनाउनका लागि चिनियाँ सरकार, सबै तहका उद्यम र संस्थाहरूले वास्तवमै ठूलो संख्यामा गतिविधिहरू आयोजना गर्न धेरै प्रयास गरेका छन्। उनीहरूको प्रयासले काठमाडौं उपत्यकाका गल्लीहरूमा ड्रयागन वर्षको उत्सवमय माहोल भरिएको छ। काठमाडौंको मध्यभागमा रहेको रत्नपार्क पनि सुन्दर तरिकाले सजाइएको र हर्षोल्लासले भरिएको थियो ।