दुई विदेशी कलाकारका कला साताव्यापी प्रर्दशन गरिने

breaking news

काठमाडौँ: ‘आन्तरिक परिदृश्य’ शीर्षकमा दुई विदेशी कलाकारका कला साताव्यापी रूपमा प्रर्दशन गरिने भएको छ । ताइवानकी चाउ मेङ येह र लिथुआनियाकी गेर्डा ल्युड्विनाभिसियुटेकाले सिर्जना गरेका कला प्रर्दशनी गरिने भएको हो । आर्टुडियो अन्तर्राष्ट्रिय कलाकार रेसीडेन्सी कार्यक्रम २०२४ अन्तर्गत दुवै जनाले नेपाल आई सिर्जना गरेका रचनात्मक कार्यको सम्मान स्वरुप प्रर्दशनी हुन लागेको हो । आर्टुडियोमै यही मङ्सिर १४ देखि एक सातासम्म प्रदर्शनी हुनेछ ।

आर्टुडियोका संस्थापक र निर्देशक कैलाश के श्रेष्ठले प्रर्दशनीबारे उत्साहित हुँदै भन्नुभयो, “यो प्रदर्शनीले हामीलाई कलाले एउटा सार्वभौमिक भाषाको रूपमा कसरी जोड्छ भन्ने शक्ति प्रदर्शन गर्नेछ ।” उहाँका अनुसार कलाकार चाउको कला दृष्टिकोण मानवशास्त्र र ललित कलाको समृद्ध शैक्षिक पृष्ठभूमिमा आधारित छ । यस्तै, उहाँको काम प्रायः सांस्कृतिक कथा, पहिचान र स्थानीय धारणामा आधारित छ । चाउले आफ्ना सिर्जना राष्ट्रिय र अन्तर्राष्ट्रिय प्रदर्शनीमा प्रस्तुत गर्दै समकालीन कलाको क्षेत्रमा महत्वपूर्ण योगदान गर्दैआउनुभएको छ ।

अर्का कलाकार गेर्डाको कला भने मनोविज्ञान र स्वास्थ्य अध्ययनमा केन्द्रीत छ । उनको अनुसन्धान मानवीय र गैरमानवीय अस्तित्वको परस्पर सम्बन्धमा केन्द्रित छ, जहाँ परिवर्तन र शरीरबारे धारणाको विषयलाई अन्वेषण गरिएको छ । उहाँका सिर्जनाले मानव प्रकृतिको सार र आन्तरिक पारिस्थितिक तन्त्रप्रतिको निर्भरतामा विचार उत्पन्न गराउने जानकारहरू बताउँछन् ।