दक्षिण कोरियाली सहरमा भयङ्कर ठूलो डढेलो, अहिलेसम्म १८ जनाको मृत्यु

विश्व प्रवास

काठमाडौं । दक्षिण कोरियाको उत्तरी ग्योङसाङ प्रान्तको उइसोङमा डढेलोका कारण १८ जनाको मृत्यु भएको छ ।

उक्त डढेलोमा परि १९ जना घाइते भएका छन् । दि कोरिया टाइम्सका अनुसार गत सातादेखि लागेको डढेलो उत्तर ग्योङसाङ प्रान्तको उइसोङबाट शुरु भइ दक्षिणपूर्वी कोरियामा फैलिएको छ । तीव्र हावाहुरी र सुख्खा मौसमका कारण छिमेकी चार शहरमा डढेलो फैलिएको हो ।

गत हप्तादेखि अहिलेसम्म डढेलोका कारण प्रभावित क्षेत्रका २३ हजार ४ सय ९१ बासिन्दा विस्थापित भएका छन्, जसमध्ये उइस्याङमा २ हजार ९ सय ७५, चियोङसोङमा १३ हजार ३ सय ९१, योङयाङमा ९ सय ८० र योङदेओकमा २ हजार २ सय ८ जना रहेको समाचारमा उल्लेख छ ।

उइसोङको जङ्गलमा लागेको डढेलोले चार शहर र काउन्टीहरू – एन्डोङ, च्योङसोङ, योङयाङ र योङदियोकलाई प्रभावित गरिरहेको छ । घना बस्ती भएको क्षेत्रमा आगो निभाउन ८७ वटा हेलिकप्टर परिचालन गर्ने र ४ हजार ९ सय १९ जना सुरक्षाकर्मी परिचालन गर्ने अधिकारीहरुको योजना छ । यद्यपि, तीव्र बतासले अग्नि नियन्त्रकको प्रयासमा बाधा पुर्‍याइरहेको छ ।