के वरिष्ठ अधिवक्ता शम्भु थापाका दिन सकिएकै हुन् ?

काठमाडाैं । ‘न्यायाधीश घुस खान्छन्, हामी वकिलहरू पनि घुस् खुवाउँछौँ’ भन्ने अभिव्यक्ति दिएर विगतमा आलोचित बनेका वरिष्ठ अधिवक्ता शम्भु थापा फेरि विवादमा परेका छन् ।

यसपटक उनको बोलीले मात्र नभई बोली, व्यवहार तथा आचरणले उनी विवादमा परेका हुन् ।

अख्तियार दुरुपयोग अनुसन्धान आयोगले पूर्वप्रधानमन्त्री माधवकुमार नेपालविरुद्ध भ्रष्टाचारको मुद्दा चलाएपछि उनी बुद्धनगरस्थित नेकपा एकीकृत समाजवादीको कार्यालय पुगेका थिए । त्यहाँ भलाकुसारीपछि उनी विवादास्पद छविका वरिष्ठ अधिवक्ता गोविन्द वन्दीसहित कार्यालयबाट बाहिरिँदै थिए ।

एकीकृत समाजवादीका अध्यक्ष माधव नेपालविरुद्ध मुद्दा परेका दिन सो पार्टी कार्यालयमा पत्रकारको बाक्लो उपस्थिति स्वाभाविक नै थियो । त्यहाँ पत्रकारहरूको चहलपहल थियो । थापाहरू निस्कने क्रममा पत्रकारहरू नजिक पुगे र कसैले फोटो त कसैले भिडियो खिच्न थाले ।

त्यसक्रममा एक्कासी थापाले मोबाइल र चस्मा समाएको देब्रे हातले एक क्यामरामाथि प्रहार गरे । उनको बाहुबली शैलीले क्यामरा तल धकेलियो ।

यो पनिः संवैधानिक इजलासमा वरिष्ठ अधिवक्ता शम्भु थापाकै व्यक्ति केन्द्रित बहस, महान्यायाधिवक्ताको तर्क बलियो बन्दा जवाफमा लाञ्छना

त्यसपछि थापाले प्रश्न गरेँ- ‘के गरेको यो ? पत्रकारले फोटो खिचेको भनेर कुनै अनुमति लिनु पर्दैन ।’

त्यसपछि पत्रकारहरू स्वाभाविक रूपमै उनीमाथि प्रश्न बोकेर जाइलागे । पत्रकारहरूले भने- ‘यो पार्टी कार्यालय हो, यो सार्वजनिक स्थल हो ।’ थापा आफ्नो गाडीतिर बढ्दै थिए । पत्रकारहरू भन्दै थिए- ‘वकिल भएर यस्तो गर्ने ? क्यामरामा हिर्काउने ।’

थापा पत्रकारहरूलाई हेर्दै ‘के गर्नुहुन्छ त मलाई तपाईँहरूले भन्दै आँखा तर्दै अगाडि बढे ।

पत्रकारहरूले वरिष्ठ अधिवक्ता भएर पनि कानून थाहा छैन भनेर परैबाटै प्रश्न गरिरहेका थिए । यति घटनाक्रमपछि थापालाई उनका सहयोगीले गाडीभित्र छिराए ।

थापासँगै आएका विवादास्पद छविका गोविन्द वन्दी पत्रकारहरूमाथि ज्यादती हुँदा पनि मूकदर्शक बनेका थिए । हुन त बन्दी माधव नेपालकै निगाहमा कानून मन्त्री बन्दा लेनदेनका आधारमा न्यायाधीश गर्न खोजेको भनी विवादमा परेका थिए । काम फत्ते नभएपछि लिइएको रकमको हिसाब मिलान अझै भइनसकेको चर्चा सर्वोच्च अदालततिर हुने गरेको छ ।

वरिष्ठ अधिवक्ता थापा यसअघि एक टेलिभिजनलाई अन्तर्वार्ता दिँदै ‘न्यायाधीशहरूलाई वकिलहरूले घुस दिने गरेको’ बताएको सन्दर्भलाई कानून व्यवसायीहरूले अझै कलंकको टीकाको रूपमा स्मरण गर्ने गरेका छन् ।

थापाले संवैधानिक इजलासमा संवैधानिक निकायमा ५२ जना पदाधिकारी नियुक्तिविरुद्धको रिटमा बहसका क्रममा पनि आचारसंहिता विपरीत व्यक्तिगत टिप्पणीहरू गरेका थिए ।

थापाले महान्यायाधिवक्ता रमेश बडाललाई ‘महान्यायाधिवक्तो’ भनेर सम्बोधन गरेपछि न्यायाधीश र त्यहाँ पुगेका कानून व्यवसायीहरू अचम्मित भएका थिए ।

४७ वर्ष वकालतका क्रममा थापा प्रभावशाली गनिन्थे । तर समय सदैव एकनास रहँदो रहेनछ । पछिल्लो एक दशकयता थापाको साख गिर्दो छ । उनी अब वकालती क्षेत्रमा लोप हुने अवस्थामा पुगेका छन् । आक्रामक र रुखो प्रस्तुति, मुद्दामा तथ्यको अध्ययनमा अरुचि, समय व्यवस्थापनमा समस्या त उनको पुरानै समस्या थियो नै तर अब व्यक्तिगत लाञ्छनादेखि पत्रकारमाथिको दुर्व्यवहारले अब थापाको दिन सकिएको संकेत गरेको छ ।

भिडियोः 

Comments