काठमाडौं महानगरद्वारा पानीको जार अनुगमन गर्दा मापदण्ड विपरीतका २७१ जार नष्ट

समाचार

- न्युज नेपाल

काठमाडौं । काठमाडौँ महानगरपालिकाले पिउने प्रशोधित पानीको गुणस्तर जाँचलाई कडाइ गर्दै पछिल्लो एक सातामा मापदण्ड नपुगेका २७१ जार बरामद गरी नष्ट गरेको छ।

बर्खायाममा पानीजन्य रोगको जोखिम बढेसँगै महानगरले बल्खु, चाबहिल–चुच्चेपाटी, माछापोखरी–बालाजु र कोटेश्वर क्षेत्रमा चेकपोस्ट राखी नियमित अनुगमन गर्दै आएको छ।

कृषि तथा पशुपन्छी विभागका प्रमुख नुरनिधि न्यौपानेका अनुसार असार र साउन महिनामा मात्र १३९ सवारी साधन चेकजाँच गर्दा ४५६ वटा फोहोर, कुचिएका वा मापदण्ड विपरीतका जार बरामद गरी नष्ट गरिएका छन्।

महानगरले पानी उत्पादक कम्पनीहरूलाई जारमा उत्पादन मिति र स्पष्ट लेबल अनिवार्य राख्न, बिल–बिजक साथमा लिएर हिँड्न र गुणस्तरमा संवेदनशील हुन कडा निर्देशन दिएको छ।

फुड टेक्नोलोजिस्ट अशोक पराजुलीका अनुसार प्रयोगशालामा पठाइएका नमुनाको परीक्षणले पानीको शुद्धता र सुरक्षितता सुनिश्चित गरिनेछ। विगतमा बल्खु, कालीमाटी र टङ्केश्वर क्षेत्रमा हैजाका बिरामी देखिएकोले महानगरले आगामी दिनमा समुदायस्तरमा पानी परीक्षण र सचेतना कार्यक्रम सञ्चालन गर्ने तयारी गरेको छ।

महानगरले साउन १८ गते अनुगमनका क्रममा कोटेश्वरमा १५ सवारी चेकजाँच गर्दा ७७ जार बरामद गरेकाे थियाे । त्यस्तै, साउन २० गते बल्खुमा ८ कम्पनीका सवारी जाँच गर्दा ५९ जार, साउन २१ गते चाबहिल–चुच्चेपाटीमा १९ सवारी अनुगमन गर्दा ६७ जार बरामद गरेकाे थियाे भने साउन २३ गते माछापोखरी–बालाजुमा २० सवारी अनुगमन गर्दा ६८ जार बरामद गरेकाे जनाएकाे छ ।