चितवनमा जापानिज इन्सेफ्लाईटिसबाट तीन जनाको मृत्यु

प्रदेश

- न्युज नेपाल

काठमाडौं । चितवन जिल्लाका विभिन्न अस्पतालमा उपचारका लागि आएका जापानिज इन्सेफ्लाईटिसका बिरामीमध्ये तीन जनाको मृत्यु भएको छ।

साउन २३ गतेदेखि भदौ ३ गतेसम्मको नमुना परीक्षणका क्रममा ९ जनामा संक्रमण देखिएको थियो। तीमध्ये ३ जनाको मृत्यु भएको हो।

जनस्वास्थ्य कार्यालय चितवनका किट नियन्त्रक राम केसीका अनुसार मृत्यु हुनेमा कालिका नगरपालिका–५ का ८९ वर्षीय वृद्ध, राप्ती नगरपालिका–१२ की ७० वर्षीय वृद्धा र भरतपुर महानगरपालिका–१२ की ८१ वर्षीया वृद्धा रहेका छन्। गत आर्थिक वर्षमा चितवनमा देखिएका ३ जना संक्रमितमध्ये एक जनाको मृत्यु भएको थियो।

केसीले भने, ‘जापानिज इन्सेफ्लाइटिस भरतपुर महानगरपालिका, कालिका नगरपालिका, राप्ती नगरपालिका, खैरहनी नगरपालिका र माडी नगरपालिकाका व्यक्तिमा देखिएको छ।’

कालिका नगरपालिकामा एउटै वडामा दुई जनालाई संक्रमण देखिएको छ। भरतपुर महानगरपालिकाको तीनवटा वडामा, राप्ती नगरपालिकाको दुईवटा वडामा, खैरहनी नगरपालिकाको एउटा वडामा र माडी नगरपालिकाको एउटा वडामा एकरएक जनामा यो रोगको संक्रमण देखिएको हो।