ग्लोबल आइएमई बैंकको ‘गोल बेस्ड सेभिङ्ग’ योजना सार्वजनिक !

अर्थ र बाणिज्य

- न्युज नेपाल

काठमाडाैं । ग्लोबल आइएमई बैंकले ‘गोल बेस्ड सेभिङ्ग’ योजना ल्याएको छ । यस योजनामा ग्लोबल आइएमई बैैंकको मोबाइल बैंकिङ्ग प्रयोगकर्ताहरुले बचत सुरुवात गरी भविष्यमा गर्नुपर्ने आफ्ना योजनाहरुको सजिलैसँग वित्तीय व्यवस्थापन गर्न सक्नेछन्। यो योजनामा ग्राहकहरुले न्यूनतम् ५० हजार रुपैयाँदेखि अधिकतम् ५ लाख रुपैयाँसम्मको लक्ष्य रकम बचत गर्न सक्नेछन्।

बचत अवधि न्यूनतम ६ महिनादेखि अधिकतम दुई वर्षसम्म हुनेछ । ग्राहकले आफ्नो निर्धारित लक्ष्य प्राप्त गर्न मासिक कति पैसा बचत गर्नुपर्ने हो ? कति ब्याजदर प्राप्त हुन्छ ? र उक्त लक्ष्य कति समयमा पूरा हुन्छ ? भन्ने जानकारी मोबाइलबाटै प्राप्त गर्न सक्नेछन् ।

योजनामा मोबाइल बैंकिङ्ग प्रयोगकर्ताले विभिन्न शीर्षकमा बचत शुरुवात गरी भविष्यमा गर्नुपर्ने आफ्ना योजनाको वित्तिय व्यवस्थापन गर्न सक्ने बैंकको भनाइ छ । बैंकका अनुसार मासिक आवश्यक रकम सिधैं प्राथमिक बचत खाता वा आफैंले तोकेको मितिमा मासिक आवश्यक रकम राख्ने भन्ने विकल्प पनि हुन्छ ।

ग्राहकले आफूले इच्छाएको रकम गोल बेस्ड सेभिङमा टप अपसमेत गर्न सक्नेछन् । योजनामा राउण्डअप सेभिङ्गको पनि सुविधा छ । यसअन्तर्गत ग्राहकले हरेक मर्चेन्ट क्यूआर भुक्तानी गर्दा कति पैसा उक्त निर्धारित लक्ष्य योजनामा बचत गर्ने भन्ने सुविधा पाउनेछन् ।

यो राउण्डअप सेभिङ्गमा नियरेस्ट टु, फ्ल्याट र प्रतिशत गरी तीन फरक विकल्प छन् । ग्राहकले आफ्नो आवश्यकताअनुरुप यो सुविधा सक्रिय र निष्क्रिय गर्न सक्ने बैंकले जनाएको छ । साथै, विकल्पहरु पनि आवश्यकताअनुसार परिवर्तन गर्न सकिने छ ।

नियरेस्ट टु छनौट गर्दा कतिको नजिक रकम छनौट गर्ने भनि उल्लेख गर्नुपर्छ । उदाहरणका लागि २२४ रुपैयाँ मर्चेन्ट क्युआरमा भुक्तानी गर्दा २५ मा सेट गरिएको छ भने एक रुपैयाँ निर्धारित लक्ष्य योजनामा बचत हुन्छ र ३० मा सेट गरिएको छ भने ६ रुपैयाँ बचत हुन्छ ।

फ्ल्याट रकम विकल्प छनौट गर्दा हरेक कारोबारमा कति रकम उक्त निर्धारित लक्ष्य योजनामा बचत गर्ने भन्ने हुन्छ । जस्तै एक सय रुपैयाँ फ्ल्याट रकम विकल्पमा छनौट गरिएको छ भने हरेक मर्चेन्ट क्यूआरमा भुक्तानी गर्दा एक सय रुपैयाँ बचत हुन्छ ।

प्रतिशत विकल्प छनौट गर्दा हरेक क्युआर भुक्तानीको रकममा निर्धारित प्रतिशत रकम सो योजनामा बचत हुन्छ । उदाहरणका लागि दश प्रतिशत छनौट गरिएको छ भने दुई सय रुपैयाँको क्युआर भुक्तानी गर्दा २० रुपैयाँ उक्त लक्ष्य योजनामा बचत हुन्छ ।

उक्त निर्धारित लक्ष्य योजनाको बचत रकममा बैंकले उच्चतम् ब्याजदर प्रदान गर्ने जनाएको छ । बैंकका मोबाइल प्रयोगकर्ताले आफ्नो मोबाइल बैंकिङ्ग एप ग्लोबल स्मार्ट प्लसमार्फत योजनामा जोडिएर बचत गर्न सक्नेछन् ।

ग्राहकले निर्धारित समयअगावै खाता बन्द गर्न र योजनाको सम्पूर्ण प्रक्रिया आफैंले मोबाइल बैंकिङ्गबाट सञ्चालन गर्न सक्ने बैंकको भनाइ छ । साथै, कारोबारको विवरण ग्राहकले ग्लोबल स्मार्ट प्लसमार्फत हेर्न सक्नेछन् ।