श्रमजीवी पत्रकार संघ नेपालका अध्यक्ष जन्मदेव जैसी भारतमा, श्रमजीवीका विषयमा घनीभूत छलफल

अर्थ र बाणिज्य

काठमाडौं । श्रमजीवी पत्रकार संघ हरियाणाको निमन्त्रणमा श्रमजीवी पत्रकार संघ नेपालका अध्यक्ष जन्मदेव जैसी यतिबेला भारतको हरियाणामा श्रमजीवी विशेष कार्यक्रममा सहभागिता जनाइरहनु भएको छ । पत्रकारका समान मुद्धामा सहकार्य गर्ने उद्देश्यले अध्यक्ष जैसी हरियाणा प्रदेशका ७ जिल्लामा आयोजित विभिन्न कार्यक्रममा सहभागिता जनाइरहनु भएको हो । नयाँ दिल्ली र हरियाणाका विभिन्न जिल्लाका पत्रकार संघसंगठनहरुले अध्यक्ष जैसीसँग छलफल, भेटघाटलगायतका कार्यक्रम गर्दै भव्य स्वागत गरेका छन् ।

दुई देशका श्रमिक संघठनबीच पेसागत हकहित, मर्यादा, अधिकार, आत्मनिर्भरता, पेसागत पारदर्शिता, पेसाको सम्मान बढाउनेलगायत विषयमा छलफल भएको हरियाणाबाट अध्यक्ष जैसीले यस सञ्चार माध्यमलाई जानकारी दिनु भयो । नेपाल अध्यक्ष जैसी भन्नुहुन्छ, ‘दक्षिणा एसियाकै ट्रेड युनियन पत्रकारहरुबीच एउटा संयुक्त मोर्चाका साथ साझा अभियान बनाएर अघि बढ्ने विषयमा छलफल भएको छ ।’

छलफल कार्यक्रममा सहभागी हुँदै अध्यक्ष जैसीले श्रमजीवी पत्रकारहरूको पेसागत हकहित, मर्यादा र अधिकारका विषयमा नेपाल र भारतका पत्रकार संगठनहरूबीच सहकार्य र एकताको आवश्यकतामा जाेड दिनुभयो । उहाँले दुई देशका संगठनहरू एउटै मञ्चमा उभिएर साझा मुद्दामा काम गर्नुपर्नेमा जोड दिनु भएको छ । जैसी भन्नुहुन्छ, ‘यी दुई देशका संस्थाहरुबीचको भेलाको उद्देश्य भनेको जुनसुकै देशका पत्रकारहरु पेसागत हिसावले एकै हुन्छन् भन्ने हो ।’

अध्यक्ष जैसीले यस भ्रमणलाई दक्षिण एसिया क्षेत्रमै श्रमजीवी पत्रकारहरूको साझा संगठन निर्माण गर्ने पहलका रूपमा पनि महत्वपूर्ण भएको उल्लेख गर्नु भएको छ । उहाँले क्षेत्रीय स्तरमा एकीकृत आवाज उठाउन सके पत्रकारहरूको हकहित अझ प्रभावकारी रूपमा संरक्षण गर्न सकिने विश्वास व्यक्त गर्नु भएको छ। अध्यक्ष जैसीको भ्रमणले नेपाल–भारतबीचका पत्रकार संगठनहरूबीच सम्बन्ध अझ सुदृढ बनाउने र भावी सहकार्यका लागि मार्ग प्रशस्त गर्ने अपेक्षा गरिएको छ।