रेशम चौधरीलाई आममाफीविरुद्ध परेको मुद्धाको आज सुनुवाई हुँदै

राजनीति

काठमाडौं । रेशम चौधरीलाई आमआफी दिनेविरुद्ध परेको मुद्धाको आज (शुक्रबार) पेशी तोकिएको छ । टीकापुर घटनामा मारिएका नेपाल प्रहरीका प्रहरी निरीक्षक केशव बोहराकी पत्नी शारदा कडायत बोहराले चौधरीलाई आममाफी दिनेविरुद्ध सर्वोच्चमा पेस गरेको मुद्धाको सुनुवाई हुने भएको हो । ।

आज न्यायायाधीशद्वय अब्दुल अजिज मुसलमान र सुनिलकमाुर पोखरेलको इजलासमा पेसी तोकिएको छ । अहिलेसम्म ११ वटा पेसी चढेको छ भने मुद्धा हेर्न नभ्याइनेमा र कहिले स्थगित हुँदै आएको अवस्था छ ।

रेशम चौधरीको रिहाइप्रति असहमति जनाउँदै न्याय संरक्षणको मागसहित पीडित बोहोराले राष्ट्रपतिसमक्ष पनि निवेदन दर्ता गराएकी छन् ।

यसअघि २०८० कार्तिक महिनामा सर्वोच्च अदालतले जन्मकैद सजाय पाएका योगराज ढकाल रिगललाई आममाफी दिने सरकारको निर्णय बदर गर्न आदेश दिएको थियो । चौधरीलाई दिइएको आममाफी सम्बन्धमा पनि यस्तै निर्णय आउनुपर्ने पीडित पक्षको जिकिर छ । रिगलभन्दा अगाडि चौधरीविरुद्ध मुद्धा दर्ता भएको थियो ।

चौधरी २०७२ भदौ ७ गते कैलालीको टीकापुरमा थरुहट थारुवान आन्दोलनका क्रममा नेपाल प्रहरीका एसएसपी लक्ष्मण न्यौपानेसहित सात सुरक्षाकर्मी र एक नाबालकको मृत्यु हुनेगरी भएको हिंसात्मक घटनाका आरोपित व्यक्ति हुन् ।